Երևանում՝ կայանված մեքենայում, հրդեհ է բռնկվել, վիրավոր կա, ավտոմեքենան վերածվել է մոխրակույտի

Դեկտեմբերի 24-ին, արտակարգ դեպք է տեղի ունեցել Երևանում։ Ժամը 23:00-ի սահմաններում ՀՀ Ներքին գործերի նախարարության Փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Կոմիտասի պողոտա - Վաղարշյան փողոց խաչմերուկում ավտոմեքենա է այրվում։

Shamshyan-ի հաղորդմամբ՝ հրշեջները մարել են Վաղարշյան փողոցում կայանված «Dodge» մակնիշի ավտոմեքենայում առաջացած կրակը, սակայն ավտոմեքենան ամբողջությամբ վերածվել է մոխրակույտի։

Ոստիկաններն ու պարեկները պարզել են, որ 1 հոգի այրվածքներով տեղափոխվել է Այրվածքաբանության ազգային կենտրոն։ Ըստ տեղեկությունների՝ նրա կյանքին վտանգ չի սպառնում։

Դեպքի փաստով ոստիկանության Արաբկիրի բաժնում փաստաթղթեր են ձևակերպվում որոնք հնարավոր է փոխանցվեն ՀՀ Քննչական կոմիտեի Երևան քաղաքի քննչական վարչության Արաբկիրի քննչական բաժին։

Պարեկային ծառայությունը ու ոստիկանության Արաբկիրի բաժինը պարզում են ավտոմեքենայի սեփականատիրոջ և հիվանդանոց տեղափոխված վիրավորի ինքնությունը։