Գուտերեշը կարծում է, որ Իրանը պետք է հայտարարի միջուկային զենքից հրաժարվելու մասին

ՄԱԿ-ի գլխավոր քարտուղար Անտոնիո Գուտերեշը կարծում է, որ Իրանը պետք է մեկընդմիշտ հայտարարի, որ հրաժարվել է միջուկային զենք ունենալու իր մտադրությունից՝ տարածաշրջանում իրավիճակը կայունացնելու համար, գրում է Euromedia24-ը։

 

«Հուսով եմ, որ իրանցիները կհասկանան, որ անհրաժեշտ է մեկընդմիշտ հստակեցնել, որ նրանք հրաժարվում են միջուկային զենքի տիրապետումից և միևնույն ժամանակ, պատրաստ են կառուցողականորեն համագործակցել տարածաշրջանի այլ երկրների հետ՝ ստեղծելու անվտանգության նոր ճարտարապետություն», - ասել է նա՝ ելույթ ունենալով Դավոսում Համաշխարհային տնտեսական համաժողովում։

 

Նա չի բացառել, որ իրավիճակը հակառակ ուղղությամբ կզարգանա, ինչը կհանգեցնի էսկալացիայի։

 

Գուտերեշը նաև կարծում է, որ Իսրայելի և ԱՄՆ-ի հետ հարաբերությունները կարգավորելու համար Իրանը պետք է «առաջին քայլն անի»։ «Իրանը պետք է անի առաջին քայլը, քանի որ հակառակ դեպքում կա էսկալացիայի վտանգ»,- ասել է նա։

 

ԱՄՆ նախագահ Դոնալդ Թրամփը իր երկրորդ նախագահական ժամկետի նախօրեին չի բացառել Թեհրանի հետ զինված հակամարտություն սկսելու հնարավորությունը՝ միջուկային զենք ստեղծելու ենթադրյալ փորձերի պատճառով։