Եթե իրավաչափ է՝ ուրեմն իրավաչափ է․ նախարարը՝ Գարիկ Սարգսյանի ինքնապարգևատրման մասին

«Վեդի համայնքի ղեկավար Գարիկ Սարգսյանին կքննադատե՞ք, որ իր սեփական որոշմամբ, լավ աշխատելու հիմնավորմամբ ինքն իրեն 104 տոկոսով պարգևատրել է։ Դուք այդքան լավ եք աշխատում, բայց Ձեզ պարգևավճար չեք տալի՞ս»,– լրագրողներն այսպիսի հարց ուղղեցին առողջապահության նախարար Անահիտ Ավանեսյանին։

«Նոր եմ դրա մասին իմանում։ Կհասկանամ հարցն ինչումն է։ Եթե կարիքը զգամ կամ հիմք տեսնեմ՝ ինչու ոչ։ Մենք շատ բաց քննարկումներ ենք ունենում և չենք խորշում որևէ հարց քննարկելուց։

Այստեղ երկու մոտեցում կա։ Պետք է նայել՝ ինչն է իրավաչափ, ինչը՝ ոչ։ Եթե իրավաչափ է՝ ուրեմն իրավաչափ է, եթե ոչ՝ արդեն ոչ։ Այստեղ դա է չափորոշիչը»,– ասաց նա։

Ավելի վաղ Euromedia24-ը հաղորդել էր, որ վարչապետ Փաշինյանի սանիկ Վեդու համայնքապետ Գարիկ Սարգսյանը, որին մարզպետ եղած ժամանակ կոկորդիլոսաբուծարանի երազանքի համար մարդիկ կնքեցին կոկորդիլոս մականունը, այնքան գոհ է ինքն իր աշխատանքից, որ տարեմուտից առաջ ինքնապարգևատրվել է 100 տոկոս աշխատավարձով։