Պուտինը ուղերձ է հղել Աբխազիայի նորընտիր նախագահին

Ռուսաստանի նախագահ Վլադիմիր Պուտինը շնորհավորել է Բադրա Գունբային Աբխազիայի նախագահի պաշտոնում ընտրվելու կապակցությամբ։ ՌԴ նախագահի  ուղերձը հրապարակվել է Կրեմլի կայքում։

«Հարգելի Բադրա Զուրաբովիչ, ընդունեք իմ անկեղծ շնորհավորանքները Աբխազիայի Հանրապետության նախագահի պաշտոնում ընտրվելու կապակցությամբ»,- ասված է շնորհավորանքի տեքստում։

Պուտինը հույս է հայտնել, որ ռուս-աբխազական բարեկամական հարաբերությունները «կշարունակեն ամրապնդվել՝ ի շահ ժողովուրդների»։

«Ընտրություններում հաղթանակը, որը տեղի ունեցավ ժողովրդի կամքի ազատ արտահայտման պայմաններում, հաստատեց Աբխազիայի քաղաքացիների աջակցությունը ներքաղաքական կայունության և երկրի առաջադիմող սոցիալ-տնտեսական զարգացման ապահովման ձեր գծին»,- նշել է ՌԴ նախագահը` մաղթելով Գունբային հաջողություն, քաջառողջություն և բարգավաճում։