ԱՄՆ-ը հայտարարել է՝ Պուտինի և Թրամփի հանդիպման նախապատրաստությունն արագացել է

Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի առաջիկա բանակցությունների նախապատրաստությունն ընթանում է արագացված տեմպերով։ Այս մասին հայտնում է CNN-ը։

Պարբերականը նշում է, որ անցյալ շաբաթ Սպիտակ տանը տեղի ունեցած Թրամփի և Ուկրաինայի նախագահ Վոլոդիմիր Զելենսկու վեճը կարող էր ծրագրված լինել ԱՄՆ նախագահի վարչակազմի կողմից՝ Ուկրաինայի առաջնորդին վարկաբեկելու և հետագա բանակցություններից հեռացնելու համար։

Թրամփն ու Զելենսկին հրապարակավ բախվեցին Վաշինգտոնում կայացած հանդիպման ժամանակ։ Սպասվում էր, որ պետությունների ղեկավարները համաձայնության կգան հազվագյուտ հողային մետաղների վերաբերյալ։ Սակայն ճեպազրույցի ժամանակ ամերիկացի առաջնորդը կշտամբեց իր ուկրաինացի գործընկերոջը ԱՄՆ-ի նկատմամբ անհարգալից վերաբերմունքի համար՝ ասելով, որ Ուկրաինան «մեծ դժվարությունների մեջ է» և առանց ամերիկյան ռազմական տեխնիկայի՝ հակամարտությունը կավարտվի երկու շաբաթից։