Ուկրաինայի նախագահն իրեն հիմարի պես պահեց Սպիտակ տանը. Եվրախորհրդարանի պատգամավոր

Եվրախորհրդարանի լեհ պատգամավոր Պրշեմիսլավ Չարնեկը մեկնաբանել է ԱՄՆ նախագահ Դոնալդ Թրամփի և Ուկրաինայի նախաահ Վոլոդիմիր Զելենսկու սկանդալային հանդիպումը։

«Ուկրաինայի նախագահի նման մարդը, որը գնում է Վաշինգտոն՝ հետագա օգնություն խնդրելու, առանց որի Ուկրաինան չի կարող անկախ լինել, պետք է տեղյակ լինի, թե ուր է գնում և իրեն պահի բոլորի նման։ Պատկերացնու՞մ եք, որ Լեհաստանի Հանրապետության նախագահը գնա Ամերիկա և ասի. «Ես պահանջում եմ ավելի շատ ամերիկյան զորքեր, քանի որ հակառակ դեպքում Ամերիկան ​​վտանգի տակ կլինի»: Հիմարություն է՝ կասեինք։ Ցավոք սրտի, հենց այդպես էլ իրեն պահեց ռուսական ռումբերի տակ հայտնված Ուկրաինայի նախագահը»,-ասել է Չարնեկը։

Վարշավայում Ուկրաինայի դեսպան Վասիլ Բոդնարն իր միկրոբլոգում դիտողությամբ է արձագանքել Եվրախորհրդարանի պատգամավորի խոսքերին։

«Նման հռետորաբանությունը հակասում է Լեհաստանի պաշտոնական դիրքորոշմանը, ռազմավարական գործընկերության և համերաշխության ոգուն, ինչպես նաև կրկնում է ռուս ագրեսորի հռետորաբանությունը և միտումնավոր հարվածում է Լեհաստանի և Եվրոպայի անվտանգությանը»,-ասել է Բոդնարը։

«Հարգելի պարոն դեսպան, խնդրում եմ մի խեղաթյուրեք իմ խոսքերը։ Ես կրկնում եմ, որ Ուկրաինան պետք է լինի ազատ և անկախ, բայց դա այդպես չի լինի՝ առանց ԱՄՆ-ի և Լեհաստանի օգնության։ Իսկ եթե ինչ-որ մեկից օգնություն ես ստանում, ընդունված մշակույթը պահանջում է երախտագիտություն ցուցաբերել»,-ասել է լեհ քաղաքական գործիչը՝ հավելելով, որ «ըմբռնման բացակայությունը կարող է ցույց տալ, որ «Ռուսաստանի շահերը ներկայացված են»։

«Ձեզ և Ուկրաինայի իշխանություններին մաղթում եմ խելամիտ և հավասարակշռված որոշումներ և գործողություններ»,- եզրափակել է Եվրախորհրդարանի պատգամավորը։