500 միլիոն եվրոպացիները խնդրում են 300 միլիոն ամերիկացիներին պաշտպանել իրենց 140 միլիոն ռուսներից․ Տուսկ

Եվրոպական երկրները հսկայական ներուժ ունեն, բայց իրենց անմիաբանության պատճառով հույսը դնում են ոչ թե սեփական ուժերի, այլ ԱՄՆ-ի վրա։ Ուստի Եվրոպան պետք է ակտիվանա և ջանքեր գործադրի խաղաղության ապահովման համար՝ ոչ թե Ուկրաինայի կապիտուլյացիայի, այլ սեփական պաշտպանական կարողությունների միջոցով։

Այս մասին հայտարարել է Լեհաստանի վարչապետ Դոնալդ Տուսկը՝ կիրակի օրը եվրոպացի առաջնորդների ոչ պաշտոնական հանդիպմանը Լոնդոն մեկնելուց առաջ։ 

«Դա պարադոքս է, լսեք, թե ինչպես է դա հնչում. 500 միլիոն եվրոպացիներ խնդրում են 300 միլիոն ամերիկացիներին պաշտպանել իրենց 140 միլիոն ռուսներից: Եթե կարող եք հաշվել, ապա հույսը դրեք ձեր վրա», - ասել է Տուսկը:

Նա խոսել է «երևակայության և խիզախության պակասի» մասին, քանի որ եվրոպական երկրների (ներառյալ Ուկրաինան) բանակը կազմում է 2,6 միլիոն, ԱՄՆ-ինը՝ 1,3 միլիոն, Չինաստանինը՝ 2 միլիոն, Ռուսաստանինը՝ 1,1 միլիոն զինվորական։