Ուրսուլա ֆոն դեր Լեյենը 800 միլիարդ եվրոյի եվրոպական վերազինման ծրագիր է առաջարկել

Եվրահանձնաժողովի (ԵՀ) ղեկավար Ուրսուլա ֆոն դեր Լեյենը առաջարկել է 800 միլիարդ եվրո արժողությամբ Եվրամիությանը վերազինելու ծրագիր։ Այս մասին նա հայտարարել է մամուլի ասուլիսում:

«ԵՄ-ի վերազինման ծրագիրը կարող է մոբիլիզացնել շուրջ 800 միլիարդ եվրո պաշտպանական ծախսեր՝ ապահով և տոկուն Եվրոպայի համար», - ասել է նա:

ԵՄ գործադիր մարմնի ղեկավարի խոսքով՝ Եվրահանձնաժողովը մտադիր է նաև ներգրավել 150 միլիարդ եվրոյի վարկ՝ ԵՄ երկրների համար հակաօդային պաշտպանության համակարգերի, իսկ Ուկրաինայի համար՝ զենքի արտադրության համար։

Փետրվարի վերջին Financial Times թերթը, վկայակոչելով եվրոպացի պաշտոնյաներին, հայտնել էր, որ ԵՄ երկրները քննարկում են վերազինման եվրոպական բանկի և համաեվրոպական պաշտպանության ֆինանսավորման հիմնադրամի ստեղծման հարցը: Նշվել է, որ Յոհանեսբուրգում G20-ի հանդիպմանը հավաքված եվրոպական երկրների ֆինանսների նախարարությունների ղեկավարները քննարկում են Մեծ Բրիտանիայի մասնակցությամբ վերազինման բանկի կամ ընդհանուր հիմնադրամի ստեղծման հարցը։