Ամերիկացիները կգնեն Պանամայի ջրանցքի նավահանգիստները․ WSJ

ԱՄՆ ներդրողների կոնսորցիումը, BlackRock ներդրումային ընկերության գլխավորությամբ, կգնի Պանամայի ջրանցքի նավահանգիստների վերահսկիչ փաթեթը, գրում է The Wall Street Journal թերթը։

Բալբոա և Կրիստոբալ նավահանգիստներն այժմ կառավարվում են հոնկոնգյան CK Hutchison ընկերության կողմից։ Պանամայի երկու նավահանգիստների ձեռքբերման գործարքը գնահատվում է 22,8 միլիարդ դոլար և ներառում է ավելի քան 40 այլ նավահանգիստներ ամբողջ աշխարհում:

WSJ-ի աղբյուրը, որն անմիջականորեն մասնակցում է գործարքին, ասում է, որ Hutchison-ը սկզբում դիտարկել է նավահանգստի բիզնեսը իր վերահսկողությունից դուրս բերելը դատարանում վիճարկելու ցանկացած փորձ: Այնուամենայնիվ, պարզվել է՝ BlackRock-ի առաջարկը «շատ ձեռնտու է»: Hutchison-ը կպահպանի նավահանգիստները Հոնկոնգում և Չինաստանում: Պանամայի մի քանի այլ նավահանգիստներ շահագործվում են այլ ընկերությունների կողմից, սակայն Balboa-ն և Cristobal-ը համարվում են ամենակարևորը:

Նախագահ ընտրվելուց հետո Դոնալդ Թրամփը ասաց, որ Միացյալ Նահանգները կարող է պահանջել վերադարձնել Պանամայի ջրանցքի վերահսկողությունը, եթե դրա օգտագործման ներկայիս պայմանները չվերանայվեն։ Նա մատնանշեց ամերիկյան նավերի համար բարձր մաքսատուրքերը։

ԱՄՆ-ը մասնակցել է ջրանցքի կառուցմանը 20-րդ դարի առաջին կեսին։ Հաստատությունը փոխանցվել է Պանամային 1977 թվականին, իսկ 1999 թվականին անցել է երկրի իշխանությունների լիակատար վերահսկողության տակ։

Թրամփն ընդգծել է, որ ջրանցքը համարվում է կենսական ազգային արժեք իր երկրի համար՝ տնտեսության և ազգային անվտանգության մեջ նրա կարևոր դերի պատճառով։ Միացյալ Նահանգների ամենամեծ մտահոգությունը հոնկոնգյան ընկերության վերահսկողությունն է ջրանցքի օբյեկտների նկատմամբ:

Պանամայի նախագահ Խոսե Ռաուլ Մուլինոն պատասխանել է Թրամփին, որ «Պանամայի ջրանցքի յուրաքանչյուր մետրը պատկանում է Պանամային, և այդպես էլ կլինի»։