ԱՀԿ. Գազայից բժշկական տարհանման կարիք ունի 12-14 հազար մարդ

Բժշկական նկատառումներով Գազայի հատվածի 12-14 հազար բնակիչներ պետք է տարհանվեն անկլավից։ Այս մասին հայտարարել է Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրեյեսուսը՝ շնորհակալություն հայտնելով Հորդանանի կառավարությանը, որը բուժման համար ընդունել է 29 պաղեստինցի երեխաների, գրում է Euromedia24-ը։

 

Այս երեխաներին Գազայից Հորդանան են տեղափոխել մասնագիտացված բուժման համար։ «Նրանց մեծամասնությունը վնասվածքաբանական, ուռուցքաբանական և ակնաբուժական խնամքի կարիք ունի»,- նշել է Գեբրիեսուսը՝ հիշեցնելով, որ սա «հրադադարից հետո առաջին բժշկական տարհանումն էր Հորդանան, որն իրականացվել է ԱՀԿ-ի աջակցությամբ»։

 

«Մոտ 12-14 հազար մարդ դեռևս բժշկական տարհանման կարիք ունի: ԱՀԿ-ն շարունակում է կոչ անել ավելացնել թույլտվությունների թիվը բոլոր հնարավոր երթուղիներով»,- հավելել է գլխավոր տնօրենը: Գազայի հատվածից բժշկական տարհանման հնարավոր ուղղությունների թվում նա անվանել է «Հորդանան գետի արևմտյան ափը, ներառյալ Արևելյան Երուսաղեմը»:

 

Ինչպես ավելի վաղ հայտնել էր քաթարյան «Ալ Ջազիրա» հեռուստաալիքը, 29 երեխաներ, որոնց մեծ մասը վիրավորվել է իսրայելական բանակի հարվածների արդյունքում, տեղափոխվել են Հորդանան բժշկական օգնության համար։ Նշվել է, որ ընդհանուր առմամբ թագավորությունը պատրաստ է ընդունել 2 հազար պաղեստինցի երեխայի։