Ջահերով երթին մասնակցել ու շարունակելու է մասնակցել մեր ազգի էլիտան, ու դա մեր ամենամեծ հարստությունն է․ Հրանտ Մելիք-Շահնազարյան

«Այսօր Ջահերով երթ է լինելու։ Լավ չեմ հիշում, բայց 2000 կամ 2001 թվականից եմ մասնակցում Ջահերով երթին։ Նույն ժամանակ էլ ՀՅԴ «Նիկոլ Աղբալյան» ուսանողական միության գրասենյակում ծանոթացել եմ Իշխան Սաղաթելյանի հետ», - տելեգրամյան ալիքում  գրել է  քաղաքագետ Հրանտ Մելիք-Շահնազարյանը։

Նա ընդգծել է, որ Ջահերով երթը շատ ավելի բովանդակալից է։

«Երթի կազմակերպչական հարցերով էինք հանդիպել։ Ու այսօր, երբ ետ եմ նայում դեպի տարիների խորքը, հասկանում եմ, որ թե՛ այն ժամանակ և թե՛ հատկապես հիմա Ջահերով երթը շատ ավելի խոր իմաստ ու բովանդակություն է պարունակում, քան զուտ Ծիծեռնակաբերդի բարձունքում Հայոց ցեղասպանության մեր մեկուկես միլիոն սրբադասված զոհերի հիշատակը հարգելն է։ Ավելին՝ նույնիսկ մեր պահանջատիրությունը չի արտահայտում երթի ողջ էությունը։ Ջահերով երթը շատ ավելի բովանդակալից է։ Այն մեր հայ լինելու մասին է։ Մեր էության։ Մեր անցյալի, ներկայի ու ապագայի մասին է։

2000 թվականին էլ, դրանից առաջ ու հետո էլ, երթին մասնակցել ու շարունակելու է մասնակցել մեր ազգի էլիտան։ Իսկականը։ Ու դա մեր ամենամեծ հարստությունն է։ Ուզու՞մ եք իմանալ, թե ինչ պոտենցիալ ունի մեր ժողովուրդը՝ նայեք Ջահերով երթի մասնակիցների քանակին։ Ուզու՞մ եք իմանալ, թե ինչ ապագա ունի մեր ժողովուրդը՝ նայեք Ջահերով երթի մասնակիցների աչքերին։ Ուզու՞մ եք տեսնել մեր ժողովրդի կամքը՝ լսեք Ջահերով երթի մասնակիցների ձայնը ու նաև նրանց լռությունը։ Ուզու՞մ եք լինել իսկական հայ՝ դարձեք Ջահերով երթի փոքր մասնիկ, նույնիսկ, եթե գտնվում եք հայրենիքից դուրս»,-գրել է նա։