TikTok-ը 1 միլիարդ եվրո կներդնի Ֆինլանդիայում

TikTok-ը հաստատել է, որ նախատեսում է 1 միլիարդ եվրո ներդնել Ֆինլանդիայում՝ կառուցելու իր առաջին տվյալների կենտրոնը Եվրոպայում, Reuters-ին հայտնել է ընկերության խոսնակը։ Այս քայլը իրականացվում է Project Clover անվամբ տվյալների անվտանգության ծրագրի շրջանակում, որի նպատակն է պատշաճ կերպով կառավարել եվրոպացի օգտատերերի տվյալները և արձագանքել գաղտնիության շուրջ աճող մտահոգություններին։

 

Այս պահի դրությամբ TikTok-ն արդեն ունի տվյալների կենտրոններ Նորվեգիայում, Իռլանդիայում և ԱՄՆ-ում։ Նորվեգական կենտրոնը սկսեց գործել այս ամսվա սկզբին։ TikTok-ը, որն ունի ավելի քան 175 միլիոն օգտատեր Եվրոպայում, հայտարարել է, որ նախատեսում է առաջիկա տարիներին նոր տվյալների կենտրոնների կառուցում, իսկ սկանդինավյան երկրները՝ հատկապես Ֆինլանդիան, համարվում են նախընտրելի՝ շնորհիվ ցածր ջերմաստիճանների ու ածխածնազերծ էլեկտրաէներգիայի։ Այս պահի դրությամբ Ֆինլանդիայում պլանավորված է ավելի քան 20 նոր տվյալների կենտրոն՝ ընդհանուր 13 միլիարդ եվրո արժեքով։