Մերձավանի դպրոցում եղել են խնդիրներ, որոնք այդ օրն արտացոլվել են այդ ձևաչափով. Անդրեասյան

Նախարարությունը Մերձավանի դպրոցում տեղի ունեցած դեպքի առնչությամբ հաղորդագրություն տարածեց, որտեղ նշել էինք, որ իրականում այստեղ գործ ունենք բազմաշերտ և տարբեր բաղադրիչներ ունեցող պրոցեսի հետ։ Այս մասին այսօր՝ մայիսի 16–ին, լրագրողների հետ զրույցում ասաց ԿԳՄՍ նախարար Ժաննա Անդրեասյանը՝ անդրադառնալով Մերձավանի դպրոցում ստեղծված իրավիճակին։

«Սա մշանակ դիրքորոշումն է, որը ես չեմ պատրաստվում քննարկել, և ես այս դիրքորոշումը փոխանցել եմ նաև մարզպետին։

Երբ որ նման դեպքեր են լինում, դա երբեք մի օրվա, մի միջադեպի դրսևորում չի։ Սա վկայում է այն մասին, որ դպրոցում եղել են խնդիրներ, որոնք այդ օրը արտացոլվել են այդ ձևաչափով, և այսօր մեր ամենակարևոր հարցն է հասկանալ՝ ինչպես է տեղի ունեցել, որ նման իրավիճակը հնարավոր է դարձել։ Որովհետև նման իրավիճակները հնարավոր են լինում, երբ ժամանակին ճիշտ չեն արձագանքում պրոբլեմներին։ Եթե ժամանակին բոլոր օղակները իրենց աշխատանքը անեն պատշաճ ու բավարար, էլի կարող են մնալ խնդիրներ, որովհետև ընդհանուր առմամբ, երբ աշխատանքային միջավայրում խնդիրներ միշտ կարող են լինել, բայց դրանք չեն կարող այսպիսի դրսևորումներ ունենալ։ Սա նաև կոմունիկացիայի պակասի, ոչ բավարար միմյանց հետ խոսելու և հաղորդակցվելու, ոչ բավարար աշխատանքի, ծնողների կողմից իրենց ներկայացվածության ու մասնակցության ոչ բավարար իմացության և բազմաթիվ խնդիրների արտացոլում է։

Հիմա մենք կոնկրետ գտնվում ենք տնօրենի ժամանակավոր պաշտոնակատարի որոշման հարցում։ Պիտի հիշեցնեմ, որ դպրոցը մարզպետի աշխատակազմի ենթակայությամբ գործող դպրոց է, նշանակումը պետք է արվի մարզպետի կողմից, բայց մենք համատեղ քննարկում ենք ժամանակավոր պաշտոնակատարի հարցը, որովհետև ակնհայտ է, որ այստեղ պետք է ունենանք բավարար փորձառու և հմտություն ունեցող անձ, ով կկարողանա տեղում նաև ճիշտ որոշումներ կայացնել»,–ասաց նախարարը։

Նա ընդգծեց, որ այստեղ միայն ժամանակավոր պաշտոնակատարի հարցը չէ, այստեղ կաշխատեն տարբեր մարմիններ, բնականաբար այստեղ պետք է լինեն թե տեսչական մարմնի, թե հանրապետական մանկավարժական հոգեբանական կենտրոնի ներգրավվածությունը պետք է լինի, որպեսզի բոլոր խնդիրների բոլոր շերտերը բացահայտվեն և դրանց ճիշտ արձագանք տրվի»։

Ժաննա Անդրեասյանը նկատեց, որ ամառային արձակուրդները բավական ժամանակ են, որպեսզի խնդիրները վերլուծվեն, ճիշտ հասցեագրվեն, և նոր ուսումնական տարում այս դպրոցը արդեն  բոլորովին այլ՝ առողջ, անվտանգ, ապահով միջավայրում գործի, որտեղ թե՛ ուսուցիչը, թե՛ աշակերտը իրեն պաշտպանված կզգան, և կկարողանան կրթության գործին ուշադրություն դարձնել։

Հարցին՝ պատմության ուսուցիչը կշարունակի՞ աշխատել այդ դպրոցում, թե՞ այդուհանդերձ իր շուրջ ստեղծված մթնոլորտը հաշվի առնելով կտեղափոխվի, ԿԳՄՍ նախարարը պատասխանեց. «Ես կարծում եմ, որ որևէ ուսուցիչ չպետք է իր աշխատանքի շարունակությունը չապահովի միայն այն պատճառով, որ այդտեղ չեն ստեղծում պայմաններ աշխատելու։ Այս դեպքը այս ձևաչափով պետք է բացառվի։ Մնացածը յուրաքանչյուրն ազատ է իր աշխատանք վայրի ընտրության հարցում։

Ամենակարևոր հարցը այն է որ ուսուցիչը դպրոցում պետք է իրեն պաշտպանված զգա և ցանկացած հարց պետք է կարգավորվի այնպես, որ չլինի անկախ նրանից թե ինչ խնդիր է եղել սա խնդրի լուծման եղանակ չէ»։