Այսուհետ զինվորները 6 ամիսը մեկ կկարողանան արձակուրդ գնալ, նաև զինվորական երդումից հետո

«Օրինագծով նախատեսվում է լրացուցիչ արձակուրդ սահմանել զինվորական երդում տալու կապացությամբ, և ժամկետային զինծառայողների համար»,-կառավարության նախաձեռնած «Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին» օրենքի նախագծին հավանություն տալու և անհետաձգելի համարելու մասին նախագիծը զեկուցելով՝ ասաց պաշտպանության նախարարի տեղակալ Հրաչյա Սարգսյանը։

Մյուս փոփոխությամբ՝ ռազմաուսումնական հաստատությունը ավարտած և ՊՆ համակարգում կամ ԱԱԾ սահմանապահ զորքերում սպայական պաշտոնների նշանակված սպաների համար գործող ծառայողական բնակարաններով ապահովման համակարգը փոխարինվում է իրենց կարիքներին համահունչ հիփոթեքային վարկավորմամբ սեփականության  իրավունքով բնակելի անշարժ գույք ձեռք բերելու իրավունքով՝ ամբողջապես պետական բյուջեի միջոցների հաշվին։

Փոխնախարարի խոսքով՝ այդ գումարը հավասարաչափ է տրվելու՝ մինչև 35 մլն դրամի սահմաններում հիփոթեքային միջոցների տրամադրմամբ։

«Օրենքով 6 ամիսը մեկ պարտադիր զինծառայողները ստանալու են արձակուրդ, իսկ արձակուրդի չափերը ծառայության բնույթից են կախված»,-պարզաբանեց Նիկոլ Փաշինյանը։

Հրաչ Սարգսյանը հանրամատչելի բացատրեց, որ գործող օրենքով ծառայության 24 ամսվա ընթացքում շարքայինների 10, իսկ սերժանտական կազմի՝ 15 օրացուցային օր ժամկետով հիմնական արձակուրդի փոխարեն մարտական հերթապահությունում ընդգրկված զինծառայողները 24 ամսվա ընթացքում կունենան 30 օր արձակուրդ, ոչ մարտական ծառայության մեջ ընդգրկված զինծառայողները՝ 21 օր, իսկ զինվորական երդում տալու կապակցությամբ 2 օր։