Մեզ ամեն օր «բռնաբարում են». սա հայոց պետականության ավարտն է. Արթուր Խաչիկյան (տեսանյութ)

Եթե այս հայտարարությունները Եկեղեցու դեմ շարունակվեն, սա կարող է հանգեցնել քաղաքացիական պատերազմի: Այս մասին Euromedia24-ի հետ հարցազրույցում նշեց Սթենֆորդի համալսարանի քաղաքագիտության դոկտոր Արթուր Խաչիկյանը՝ անդրադառնալով Հայ Առաքելական Եկեղեցու սպասավորների մասին Նիկոլ Փաշինյանի ֆեյսբուքյան գրառումներին:

Քաղաքագետի խոսքով՝ Հայաստանն այսօր ծանրագույն վիճակում է, Թուրքիան և Ադրբեջանը կարող են օգտվել ներկա իրավիճակից, որպեսզի Սյունիքը ուժով միացնեն իրենց տարածքին, մինչդեռ Հայաստանում մարդիկ զբաղված են փողոցային «քֆուրներով», մարդկանց անձնական կյանքը քննարկելով:

«Սյունիքի ապագան շատ մշուշոտ է, մենք չգիտենք՝ ինչ է լինելու: Իրանի հետ կարող է պատերազմ սկսվել, Ռուսաստանի և Ուկրաինայի պատերազմը կտրուկ էսկալացիայի է գնում, Չինաստանը կարող Թայվանի վրա հարձակվել: Դուք հասկանո՞ւմ եք՝ ձեր շուրջն ինչ է կատարվում: Այդ հիմարությունների փոխարեն եկեք լուրջ բաներից խոսենք: (…) Իրանը կարող է դիվանագիտական քայլեր անել, բայց ռազմականապես երևի չի կարող միջամտել: Իրանն ինքն է սպառնալիքի տակ՝ Իսրայելի և Միացյալ Նահանգների հարձակման սպառնալիքի տակ, և Ադրբեջանը Իսրայելի ռազմավարական դաշնակիցն է, իսկ Թուրքիան Միացյալ Նահանգների ռազմավարական դաշնակիցն է, մեր շուրջը ձևավորվել է այս դաշինքը, իսկ մենք զբաղված ենք փողոցային «քֆուրներով», և այդ հարցերը դնելով մի կողմ՝ տեսեք, թե մենք ինչով ենք զբաղված: Իրանը չի կարող հիմա այստեղ խառնվել, Իրանի վրա միանգամից հարձակում կլինի Իսրայելի, Միացյալ Նահանգների, գուցե նաև Ադրբեջանի կողմից: Թուրքիան և Ադրբեջանը կարող են օգտագործել այս իրավիճակը, որպեսզի Սյունիքը ուժով միացնեն իրենց տարածքին», - մեկնաբանեց Արթուր Խաչիկյանը:

Քաղաքագետի խոսքով՝ այդ վտանգի մասին այժմ խոսում են ե՛ւ ռուսական, ե՛ւ ամերիկյան աղբյուրները. «Տեսեք՝ ով է մեզ ղեկավարում: Դուք պատկերացնո՞ւմ եք՝ կրկին պատերազմ սկսվի, ու այս մարդիկ մեզ ղեկավարեն, որոնք ղեկավարելու տեղը դարձյալ պարզելու են, թե ով ում հետ է սեռական կյանք ունեցել: Սա ի՞նչ է: Ես երբեք չէի հավատա, որ մենք այսքան կդեգրադացվենք»:

Հարցազրույցն ամբողջությամբ՝ տեսանյութում:

Արամ Սարգսյան