Չեմպիոնների լիգայի նվաճման ճանապարհով․ Советский спорт-ի անդրադարձը Թիկնիզյանին

Հայաստանի ազգային հավաքականի պաշտպան Նաիր Թիկնիզյանը տեղափոխվում է Սերբիայի առաջատար ակումբ «Ցրվենա Զվեզդա»։ Ակնկալվում է, որ նա կստորագրի պայմանագիր մինչև 2028 թվականը՝ երկարաձգման հնարավորությամբ։ Տրանսֆերի արժեքը կկազմի մոտ 2.2 միլիոն եվրո։ Այս առիթով Советский спорт-ը հոդված է հրապարակել հայ ֆուտբոլիստի վերաբերյալ։

2023/24 մրցաշրջանում Թիկնիզյանը փայլուն ելույթներ ունեցավ Մոսկվայի «Լոկոմոտիվի» կազմում՝ Ռուսաստանի Պրեմիեր Լիգայում (ՌՊԼ) անցկացնելով 9 արդյունավետ գործողություն (6 գոլ, 3 գոլային փոխանցում)։ Սակայն ձմռանից հետո նրա խաղաժամանակը կրճատվեց, և նա կորցրեց հիմնական կազմի տեղը։ Մայիսին Թիկնիզյանը բարձրաձայնեց իր դժգոհությունը՝ նշելով, որ իրեն զգում է «վերջին աղբի պես» և ցանկանում է փոխել ակումբը։

Ի սկզբանե «Զենիթը» հետաքրքրություն ցուցաբերեց Թիկնիզյանի նկատմամբ, սակայն կողմերը չհամաձայնեցին ֆինանսական պայմանների շուրջ։ Այժմ Թիկնիզյանը մեկնում է Սերբիա՝ միանալու «Ցրվենա Զվեզդային», որը հանդես է գալիս Չեմպիոնների լիգայում։

«Ցրվենա Զվեզդայում» նրա հիմնական մրցակիցը կլինի Էբենեզեր Աննանը, ով կայուն տեղ ունի մեկնարկային կազմում։ Այդուհանդերձ, Թիկնիզյանի բարձր տրանսֆերային արժեքը և առաջիկա նախապատրաստական շրջանը նրան լավ հնարավորություններ են ընձեռում պայքարելու հիմնական կազմի տեղի համար։

Ավելին՝ սկզբնաղբյուրում։