Ինչո՞ւ Հովհաննիսյանը «նեղացած գնաց» և չմասնակցեց նոր ոստիկանապետի նշանակման միջոցառմանը․ հարց՝ ՆԳ նախարարին

Կադրային փոփոխությունները նախարարության համակարգում բնական են, որոշակի ժամանակահատված հետո, հատկապես երբ որ անձը կոնկրետ պաշտոն է զբաղեցնում, տրամաբանական է, որ կարիք կա փոփոխության։ Այս մասինլրագրողների հետ զրույցում ասել է ՆԳ նախարար Արփինե Սարգսյանն՝ անդրադառնալով մամուլի հրապարակումներին, թե արդեն նախկին ոստիկանապետ Արամ Հովհաննիսյանի ազատման պատճառն իր հետ լարված հարաբերություններն են եղել։

«Այս դեպքում եղել է հենց այդպիսի որոշում, այսինքն՝ գնահատել ենք, որ կադրային փոփոխությունն այս պահին տվյալ պաշտոնի համար կարևոր կլինի, որպեսզի ոչ թե այն տրամաբանությունը նկատի ունենալով, որ ինչ-որ մի բան վատ է կամ չգիտեմ՝ չի գնահատվել կամ չի արժևորվել պարոն Հովհաննիսյանի աշխատանքը, բնավ ոչ, այլ հակառակ տրամաբանությունն է եղել, որ որոշակի ժամանակահատված հետո պաշտոնատար անձի փոփոխությունը կարող է դրական փոփոխություն նաև բերել որոշակի մոտեցումների հարցում, նոր շունչ հաղորդել աշխատանքներին, նոր մոտեցումներ ձևավորել, նոր մեթոդներ ձևավորել, սա հերթական փոփոխությունը կարող ենք դիտարկել»,– ասել է նախարարը։

Նա նաև բարձր է գնահատել Արամ Հովհաննիսյանի աշխատանքը․

«Պարոն Հովհաննիսյանի աշխատանքը բարձր գնահատականի է արժանի, որովհետև կյանքի մեծ մասը նվիրել է ոստիկանության համակարգին, և սա որևէ ձևով անձնավորված ընդունել չի կարելի։ Ասեմ նաև, որ այն բոլոր փաստարկները կամ այն բոլոր մտքերը, որոնք որ մամուլում տարածվում են, դրանք բոլորը բացարձակապես չեն համապատասխանում իրականությանը»,– ասել է Սարգսյանը։

Հարցին, թե ինչո՞ւ Հովհաննիսյանը «նեղացած գնաց» և չմասնակցեց նոր ոստիկանապետի նշանակման միջոցառմանը, նախարարը պատասխանեց․

«Պարոն Հովհաննիսյանը, ըստ արարողակարգի, պատշաճ կերպով ծանուցվել է և հրավիրվել է նոր ոստիկանապետի նշանակման միջոցառմանը, բայց հարգելի պատճառով չի կարողացել ներկայանալ, իսկ մնացյալ հարցերը կարծում կարող եք ուղղել պարոն Հովհաննիսյանին»։