Բաքվի հետ պայմանավորվել ենք, որ համատեղ որոնողական աշխատանքներ իրականացնենք․ ԱԱԾ տնօրեն

Հայաստանի և Ադրբեջանի անհայտ կորածների հարցերով զբաղվող հանձնաժողովների հանդիպում է տեղի ունեցել։ Սա արդեն երկրորդ հանդիպումն էր։ Քննարկվել է անհետ կորածների ճակատագիրը, հնարավոր որոնողական աշխատանքները, նաև նախնական պայմանավորվածություն է ձեռք բերվել, որ այդ աշխատանքները շարունակական կլնեն։ Այս մասին լրագրողների հետ ճեպազրույցում ասել է ԱԱԾ տնօրեն Արմեն Աբազյանը։

Նա հանդիպումը դրական է գնահատել, իսկ անդրադառնալով Բաքվում պահվող հայ գերիների վերադարձի վերաբերյալ հարցին՝ նշել է․ «Մենք բոլորից շատ շահագրգռված ենք, որպեսզի օր առաջ արդյունք ունենանք։ Հիմա չեմ կարող ասել՝ արդյունք կունենանք վաղը, հինգ օր հետո, թե մի ամիս հետո, թե մի տարի հետո, բայց արդյունք ունենալու ուղղությամբ, համոզված եղե՛ք, մեր կողմից ամեն ինչ արվում է»:

Հարցին, թե երբ ադրբեջանական տարածքում աշխատանքներ կտարվե՞ն՝ ԱԱԾ պետը պատասխանել է․

«Ես չբարձրաձայնեմ, թե երբ կմտնենք, բայց նախնական մենք պայմանավորվածություն ունենք, որ համատեղ իրականացնելու ենք որողական աշխատանք»։