Սփյուռքում կան կազմակերպություններ, որոնք տարակուսած են վարչապետի արտահայտած մտքերից․ Զարեհ Սինանյան

Սփյուռքը այսպես մեկ միասնություն չի, սփյուռքում կան տարբեր խմբեր, տարբեր անհատներ, խոսքը գնում է ի վերջո միլիոնավոր մարդկանց մասին, հազարավոր կազմակերպությունների մասին: Ամեն տեսակի մոտեցում էլ կա. կան մոտեցումներ, որոնք անվերապահորեն համաձայն են վարչապետի արտահայտած մտքերի հետ, կան կազմակերպություններ, որոնք տարակուսանք ունեն։ Այս մասին լրագրողներին ասել է Սփյուռքի գործերի գլխավոր հանձնակատար Զարեհ Սինանյանը՝ անդրադառնալով ՀՀ վարչապետ Նիկոլ Փաշինյանի՝ հոգևոր դասին թիրախավորող գրառումներին։

«Կան շատ խմբեր և անհատներ, որոնք սա շատ ուշացած և նորմալ են համարում, և կան անհատներ ու խմբեր, որոնք տարակուսանք են զգում»,– նշել է Սինանյանը։

Հարցին, թե Փաշինյանը Եկեղեցուն հարված չի հասցնո՞ւմ այդ կերպ, նա պատասխանել է․ «Անկեղծ, ոչ, կարծում եմ։ Իմ կարծիքով՝ նախ հիշենք, որ Եկեղեցին դա ժողովուրդն է, Եկեղեցին այն անձինք են, որոնք ձևավորում են Եկեղեցին։ Այսինքն՝ Եկեղեցին ինչ-որ շինություն չէ, Եկեղեցին ինչ-որ հիերարխիկ վերնախավը չէ, Եկեղեցին ժողովուրդն է: Հետևաբար նման քննարկումները հարված չեն կարող հասցնել Եկեղեցուն․ Եկեղեցուն հարված են հասցնում այն անձինք, որոնք գտնվելով այդ հիերարխիայում, վարկաբեկում են Եկեղեցուն և արհամարում են հենց Եկեղեցու ներքին կանոնակարգերը»,– ասել է Սփյուռքի գործերի գլխավոր հանձնակատարը։

Նա նաև հրաժարվել է մեկնաբանել Փաշինյանի հայհոյախառն գրառումը սրբազանի մասին։

«Այս գործընթացը, ըստ իս, նաև պետության կայացման անհրաժեշտ փուլերից մեկն է, երբ որ բոլորը պետությունում իրենց պատասխանատվությունների մասով և իրենց պարտավորությունների մասով հաշվետվություն պետք է տան հայ ժողովրդին»,– պնդել է Սինանյանը։