Կաթողիկոսն ու իր սպասավորները 2021-ին քարոզում էին ընդդեմ ՔՊ-ի. Արայիկ Հարությունյան

Եկեղեցու հետ կապված մենք նախկինում էլ, հատկապես՝ վերջին տարիներին, ասել ենք, որ երբ Եկեղեցին որոշակի գործընթացներ է անում՝ միջամտելու քաղաքական գործընթացներին, երբեմն պետք է նաև պատրաստ լինի նրան, որ այլ հարցադրումներ կհնչեն քաղաքական դեմքերի կողմից: Այս մասին լրագրողների հետ զրույցում ասել է Վարչապետի աշխատակազմի ղեկավար Արայիկ Հարությունյանը՝ անդրադառնալով Նիկոլ Փաշինյանի կողմից վերջին շրջանում Հայ Առաքելական Եկեղեցուն և հոգևոր դասին թիրախավորող գրառումներին։

«Անձնական կյանքին որևէ մեկը չի միջամտել, անձնական կյանքի հետ կապված բոլոր հարցադրումներն արվել են նույն ինստիտուտի՝ Եկեղեցու ինստիտուցիոնալ տրամաբանության մեջ, տվյալ դեպքում՝ կուսակության ինստիտուտի վերաբերյալ, և հարցադրումները շարունակում են մնալ միայն այդ տրամաբանության մեջ»,– ասել է Հարությունյանը:  

Նրա խոսքով՝ այդ հարցերի պատասխանները միայն «առողջացնելու են Եկեղեցին՝ որպես ինստիտուտ»։

Հարությունյանը, անդրադառնալով «քեռակնոջ» մասին աղմկահարույց գրառմանը, նշեց․ «Չեմ ուզում ոչ մեկի անձնական կյանքին խառնվեմ»,– ապա վստահեցրեց՝ «Եկեղեցու դեմ որևէ գործընթաց չկա»։

Հարությունյանը նաև Եկեղեցուն՝ Կաթողիկոսի գլխավորությամբ, մեղադրեց 2021 թվականին ընդդեմ ՔՊ–ի քարոզ իրականացնելու մեջ․ «Եվ հանրությունը գնաց ու իր պատասխանը տվեց Կաթողիկոսին ու իր սպասավորներին»,– ասաց Վարչապետի աշխատակազմի ղեկավարը։