«Սուր երանգներ պարունակող բառամթերք է»․ նախարար Գալյանը՝ «քեռակնոջ» վերաբերյալ գրառման մասին

«Արդյո՞ք սահմանադրական կարգի խախատում չէ Նիկոլ Փաշինյանի կողմից Եկեղեցու ներքին հարցերին միջամտելը՝ հաշվի առնելով, որ, ըստ Սահմանադրության, Եկեղեցին և պետությունն անջատված են»,– նման հարց է լրագրողն ուղղել Արդարադատության նախարար Սրբուհի Գալյանին։

«Սահմանադրությունը պարունակում է, ըստ էության, մեկ դեկլարատիվ բնույթի նորմ, որի համաձայն ՀՀ–ն ընդունում է Հայ Առաքելական Եկեղեցու բացառիկ դերը հայ ժողովրդի կյանքում»,– նշել է Գալյանը՝ հարցնելով․ «Իսկ ի՞նչ է եղել, որ ստիպել է անել նման հարցադրում, ինչո՞վ է խառնվելը դրսևորվել»։

«Եկեղեցու հետ հարաբերությունները կարող են կարգավորվել օրենքով, և այսօր էլ ունենք օրենսդրական դաշտ, որը կարգավորում է որոշակիորեն այդ հարաբերությունները։ Իրականում այդ կարգավորումները միտված են Եկեղեցուն որոշակի արտոնություններ տալուն։ Այսինքն՝ ընդունում ենք, որ գոնե այս պահին առնվազն այդքանով Եկեղեցու և եկեղեցականների հետ հարաբերությունները կարող են օրենքի մակարդակում կարգավորվել։ Եվ չպետք է մոռանանք, որ մենք իրավական պետություն ենք»,– ասել է նախարարը։

Գալյանը, անդրադառնալով վարչապետի՝ «քեռակնոջ» վերաբերյալ գրառմանը նշել է․ «Դա սուր երանգներ պարունակող բառամթերք է։ Ամեն մարդ ինքն է ընտրում և եթե դա չի հատում իրաականության սահմանը, կարծում եմ՝ խնդիր չկա»։

Այնուամենայնիվ, նախարարը Հայ Առաքելական եկեղեցու հետ կապված խնդիրներ տեսնում է․ «Իմ դիտարկմամբ՝ այսօր ունենք խնդիր, ունենք Եկեղեցի, որն արդեն վաղուց զբաղվում է քաղաքականությամբ, ըստ էությամբ»։