Որովայնի ճարպը վտանգավոր է տղամարդկանց առողջության համար

Հայդելբերգի համալսարանի գիտնականները պարզել են, որ կենտրոնական ճարպակալումը (ճարպի կուտակումը իրանի և որովայնի շրջանում) տղամարդկանց մոտ հաստ աղիքի քաղցկեղի դեպքերի մինչև 25%-ի պատճառն է։ Հետազոտության արդյունքները հրապարակվել են JAMA Network ամսագրում։

Հետազոտությանը մասնակցել են Մեծ Բրիտանիայի 40-ից 69 տարեկան 458,543 բնակիչներ։ Առաջին փուլում չափվել է մասնակիցների մարմնի զանգվածի ինդեքսը (քաշի և հասակի հարաբերակցությունը), ինչպես նաև ֆիքսվել է նրանց իրանի և կոնքերի շրջագիծը։ Դրանից հետո գիտնականները սկսել են հետևել կամավորներին։

11.8 տարվա ընթացքում 5,944 մասնակիցների մոտ ախտորոշվել է հաստ աղիքի քաղցկեղ։ Վերլուծությունը ցույց է տվել, որ որովայնի շրջանում ավելորդ ճարպը ավելի մեծ ազդեցություն է ունեցել այս հիվանդության զարգացման ռիսկի վրա, քան ավելորդ քաշն ընդհանրապես։ Գիտնականների հաշվարկներով՝ հենց կենտրոնական ճարպակալումն է առաջացրել աղիքի քաղցկեղ հետազոտությանը մասնակցած տղամարդկանց մեկ քառորդի մոտ։

Գիտնականները բացատրել են, որ ավելորդ ճարպային հյուսվածքը նպաստում է ազդանշանային մոլեկուլների արտադրությանը, որոնք մեծացնում են բորբոքումը մարմնում։ Մարմնի ճարպը նաև փոխում է ինսուլինի և այլ հորմոնների մակարդակը։