Աղազարյանի և Ասլայանի մոտեցումը շատ անազնիվ է․ Էդգար Ղազարյանը՝ իմպիչմենտի գործընթացի մասին

Եթե «Հայաստան» խմբակցությունից պատգամավորները նույնպես նախաձեռնություն ցուցաբերեն, ինչը իրենց օրինական իրավունքն է, ապա այդ դեպքում կարծում եմ` մենք կունենանք նոր իրավիճակ, այսինքն` փաստորեն կստացվի երեք կամ չորս նախաձեռնություններ: Այս մասին լրագրողների հետ զրույցում ասել է «Արթուն ենք» շարժման հիմնադիր Էդգար Ղազարյանը։

«Այդ դեպքում բոլոր այն պատգամավորները, ովքեր նախաձեռնության հեղինակ են, ստիպված պետք  է լինեն քաղաքական կոնսոլիդացիայի գնալ՝ իրենց նախաձեռնությունը առաջ մղելու համար: Տեսեք, Աղազարյանի և Ասլայանի մոտեցումը, անկեղծ ասած, համարում եմ շատ անազնիվ, որովհետև եթե նրանք ի սկզբանե ցանկանում էին վարչապետին անվստահություն հայտնել, չէ՞, ուրեմն նշանակում է իրենք պետք է լուծումներ գտնեն, ոչ թե սկզբունքորեն ասեն՝ մենք մնացածին դեմ ենք։ Բայց եթե դուք մնացածին դեմ եք, ձեր երկու պատգամավորներով նախաձեռնություն էլ արդյունք չի տա, բա այդ դեպքում վարչապետին ո՞նց եք ուզում անվստահություն հայտնել»,– ասել է նա։

Հարցին, թե ինչու չմիացան «Պատիվ ունեմ»–ն ու «Հայաստան»–ը Աղազարյանի և Ասլանյանի նախաձեռնությանը, Ղազարյանը պատասխանեց․ «Կարծում եմ՝ ճիշտ որոշում կայացրին։ Դուք լսե՞լ եք իրենց թեկնածուի հայտարարությունը։ Էդմոն Մարուքյանն ասում է՝ եթե երկու թեկնածուով հիմա կա նախաձեռնություն, «Պատիվ ունեմ»–ը վեցով միանա, կլինի՝ ութ, «Հայաստան» դաշինքը ասել է՝ մենք ութի դեպքում կտանք մեր 28-ը, կլինի՝ 36, անմիջապես գործերը կհանձնենք ԱԺ նախագահին, կսկսվի իրավական պրոցեսը։ Դա նշանակում է տանել ձախողման, որովհետև որոշման կայացման համար պետք է ոչ թե 36 պատգամավորի աջակցություն, այլ՝ 54»: