Էդգար Ղազարյանը զանգահարեց ՄԻՊ գրասենյակ՝ հայտնելով, որ Ռուբինյանն իրեն չի ընդունել

Քաղաքական գործիչ Էդգար Ղազարյանն այսօր զանգահարեց ՄԻՊ գրասենյակ՝  հայտնելով, որ ԱԺ փոխնախագահ Ռուբեն Ռուբինյանը կրկին իրեն չի ընդունել։

«Առաջին անգամ եմ զանգում, որովհետև առաջին անգամ է, որ մենք կրկնահանցագործության հետ գործ ունենք»,– լրագրողների հետ զրույցում նշեց նա, ապա զանգահարեց ՄԻՊ հեռախոսահամարին և ասաց․

«Ձեզ անհանգստացնում է Հայաստանի քաղաքացի Էդգար Ղազարյանը։ Ես ձեզ տեղեկացնում եմ, որ ԱԺ աշխատակազմը քաղաքացիների ընդունելություն է հայտարարել և այսօր պետք է ընդունելություն լիներ ԱԺ նախագահի տեղակալ Ռուբեն Ռուբինյանի մոտ և նախորդ ամիս էլ է եղել նման ընդունելություն և Ռուբինյանն ինձ ընդունելության չի արժանացրել։ Ընդ որում, ոչ թե ընդունելությունն է հետաձգվել, այլ, ըստ էության, իմ նկատմամբ խտրական վերաբերմունք է ցուցաբերվել: Ես սա համարում եմ իմ իրավունքների կոպտագույն խախտում պետական բարձրաստիճան պաշտոնատար անձի կողմից և խնդրում եմ ձեզ գրանցել այս հաղորդումը ու նախաձեռնել վարույթ այդ կապակցությամբ»:

Ղազարյանը նաև նշեց՝ ակնկալում է, որ ՄԻՊ–ը հետ կզանգի և իր համար կկատարի «Արի՛, իմ սոխակ» երգը։