Փաշինյանն այդքան չկա, որ նման գործ իրականացնի․ Կյուրեղյանը՝ Կաթողիկոսին հեռացնելու փորձերի մասին

Այս օրերի զարգացումները խոսում են միայն մի բանի մասին, որ Նիկոլ Փաշինյանը, այսպես ասած, ձեռքը գցում է փրփուրներից, նա ինքը շատ լավ գիտի հանրության կարծիքն իր վարչապետության, իր իշխանության վերարտադրման մասին և շատ լավ գիտի, թե իր խոստումները չկատարելու դեպքում ինքը ում առաջ ինչ պատասխանատվություն է կրելու։ Այս մասին լրագրողների հետ զրույցում ասել է ԱԺ «Հայաստան» խմբակցության պատգամավոր Արմենուհի Կյուրեղյանը՝ անդրադառնալով Ամենայն Հայոց Կաթողիկոս Գարեգին Երկրորդին հեռացնելու Փաշինյանի նախաձեռնությանը։

Նա նշել է, որ ՀՅԴ–ն չէ, որ բերել է Փաշինյանին իշխանության, այլ կատարել է փողոցում այդ օրերին հայտնված բազմահազար հայության պահանջը, որպեսզի քաղաքացիական հրահրումներ չլինեին, ինչն այսօր անում է Նիկոլ Փաշինյանն իր ելույթներով։

Կյուրեղյանը, խոսելով Գարեգին Բ–ին հեռացնելու վարչապետի նախաձեռնության մասին, նշել է․«Նիկոլ Փաշինյանն այդքան չկա, որ նման գործ իրականացնի»։

Հարցին, թե հնարավո՞ր է, որ «Հայաստան» խմբակցությունը Սահմանադրական դատարան դիմի՝ Նիկոլ Փաշինյանի կողմից ենթադրյալ սահմանադրական կարգ խախտման համար, պատգամավորը պատասխանել է․ «Շատ լավ է, որ հանրության մեծամասնությունը հասկանում է, որ դա սահմանադրական կարգի խախտում է ․․․ Վեհափառին ընտրում է ոչ Նիկոլի նման թունդ քրիստոնյան, Վեհափառի ընտրությունը որոշակի արարողակարգային երևույթ է և այդ արարողակարգով է Վեհափառը ընտրվում»։