Հեռուստատեսությունը կամ ռադիոն չպետք է հանրության ճաշակի հետևից քարշ գա. Վասակ Դարբինյան

Ես Հանրային հեռարձակողի խորհրդի անդամ եմ արդեն երեք ու կես տարի և անակնկալ խնդիր չէր կարող լինել. բոլոր խնդիրները, որոնց բախվում ենք ամեն օր և փորձում ենք ավելի բարելավել ինչ-որ բան ՓԲԸ-ների աշխատանքում՝ լինելով իրենց կառավարող մարմինը, նոր չեն. նոր ի հայտ եկած խնդիր չկա։ Այս մասին այսօր՝ հունիսի 10–ին, ԱԺ–ում լրագրողների հետ զրույցում նշեց Հանրային հեռարձակողի խորհրդի նախագահ Վասակ Դարբինյանը:

«Այդ խնդիրները եղել են առաջին օրվանից և շարունակվում են և փորձում ենք ինչ-որ կերպ բավարարել հանրության պահանջները»,–ասաց նա։

Հարցին՝ որքանո՞վ է բովանդակային առումով հեռուստաընկերությունների խնդիրներին ուշադրություն դարձվում, նա պատասխանեց. «Հաղորդումների բովանդակությունը մեր մշտական քննարկման թեման է և դա մեր խոհանոցն է, որը չեմ կարծում, թե պիտի ես բացեմ հիմա։ Հեռուստատեսություններն են հյուր գալիս ձեր հյուրասենյակ կամ ձեր տուն, դուք  կարծում եմ՝ պետք է այդքան քաջատեղյակ չլինեք և դա շատ նորմալ կլինի։

Մենք քննարկում ենք, մենք անդադար համագործակցային դաշտում պահանջում ենք նոր հաղորդաշարեր, նոր թեմաներ,հին խնդիրների  նորովի ներկայացում և կարծում եմ՝ այդ համագործակցությունը ինչ-որ արդյունքներ այնուամենայնիվ, տալիս է։ Թեև շատ բազմաթիվ հակասական մեկնաբանություններ կարող են լինել, դժգոհություններ կարող են լինել, դա էլ է բնական, մենք ինքներս կարող ենք ունենալ մեր դժգոհությունները, որոնք աշխատում ենք շտկել։

Այնպես չի, որ հանրությունը միաճաշակ կամ միադեմ է, հանրությունը շատ տարբեր նախասիրություններ ունի և տարբեր ակնկալիքներ կարող է ունենալ, բայց դա չի նշանակում հեռուստատեսությունը կամ ռադիոն պետք է հանրության ճաշակի հետևից քարշ գա, այլ պետք է ներկայացնի իր հստակ ծրագրային քաղաքականությունը։ Դա պիտի միտված լինի պետականության ամրապնդմանը, համերաշխության հանրության մեջ և այլ, այլ բազմաթիվ բաների, որոնք  ճեպազրույցի թեմա չեն»։