Հայկական ատոմային էլեկտրակայանում ընթացքի մեջ են պլանային նախազգուշական վերանորոգման աշխատանքները

Հայկական ատոմային էլեկտրակայանում (ՀԱԷԿ) ընթացքի մեջ են պլանային նախազգուշական վերանորոգման (ՊՆՎ) աշխատանքները՝ ըստ 2025թ հաստատված ժամանակացույցի։

Ինչպես տեղեկացնում են ՀԱԷԿ-ից, վերանորոգումը մեկնարկել է մայիսին և նախատեսվում է ավարտել հուլիսի առաջին տասնօրյակում՝ ապահովելով կայանի երկրորդ էներգաբլոկի անվտանգ և հուսալի շահագործումը։

ՊՆՎ-ը ոչ միայն հնարավորություն է տալիս նորոգել ու ստուգել համակարգերը, այլ նաև կատարել կառուցվածքային և տեխնոլոգիական արդիականացումներ՝ անհրաժեշտ հետագա շահագործման համար։ Այն հանդիսանում է կայանի անխափան և անվտանգ աշխատանքի հիմնասյուներից մեկը և ուղղակիորեն նպաստում է Հայաստանի էներգետիկ անկախությանն ու կայունությանը։

ՊՆՎ 2025-ի ընթացքում Հայկական ԱԷԿ-ում նախատեսվում է իրականացնել մի շարք կարևոր տեխնիկական և անվտանգության ապահովման աշխատանքներ՝ ներառյալ ռեակտորային տեղակայանքի, տուրբինների և տուրբոգեներատորների նորոգում, ներիրանային սարքերի ստուգում, ինչպես նաև համակարգերի արդիականացում շահագործման ժամկետի կրկնակի երկարացման ծրագրի շրջանակում։

Այս աշխատանքները միտված են կայանի սարքավորումների տեխնիկական վիճակի բարելավմանը, շահագործման անվտանգության ամրապնդմանը և էներգաբլոկի շահագործման ժամկետի երկարացման նպատակների իրագործմանը։

Աշխատանքներին մասնակցում են ՀԱԷԿ-ի մասնագետները, ինչպես նաև հայաստանյան և արտասահմանյան կազմակերպությունների ներկայացուցիչներ՝ Ռուսաստանից, Չեխիայից, Խորվաթիայից, Սլովակիայից և Ուկրաինայից։

Վերանորոգման ավարտից հետո կայանում կիրականացվեն փորձարկումներ և ստուգումներ, որից հետո 2-րդ էներգաբլոկը կմիանա Հայաստանի միասնական էներգահամակարգին։