Կամո Ունանյանը 5-րդ անգամ դարձավ աշխարհի չեմպիոն

Հունիսի 6-8-ը Խորվաթիայի Վարազդին քաղաքում կայացել է օլիմպիական կարատեի 4 պաշտոնական ոճերից մեկի՝ շիտորյու մարզաձևի Աշխարհի առաջնությունը, հայտնում են Հայաստանի կարատեի միության լրատվականից։

Այս տարի մրցաշարը համախմբել էր 35 երկրի ուժեղագույն մարզիկներին։ Հայաստանը ներկայացնում էր սպորտային կարատեի աշխարհի և Եվրոպայի բազմակի չեմպիոն, Հայաստանի կարատեի միության հիմնադիր Կամո Ունանյանը։

Մրցելով Սլովակիայի, Խորվաթիայի, Բելգիայի մարզիկների դեմ՝ Ունանյանը յուրաքանչյուր մենամարտում արձանագրեց հաղթանակ։ Եզրափակչում հայ մարզիկը պայքարեց Ռումինիայի ներկայացուցչի դեմ և շիտորյու վարկածով դարձավ աշխարհի չեմպիոն։ Թեպետ մարտն ավարտվեց 3:0 հաշվով հօգուտ Ունանյանի, այն բավականին լարված էր՝ հատկապես մրցավարական որոշումների պատճառով։

«Չնայած նրան, որ 3:0 հաշվով հաղթանակ գրանցեցի, եզրափակչի մենամարտը շատ բարդ էր։ Ռումինացի մարզչական դատավորները և պաշտոնյաները տարբեր ձևերով փորձում էին ապահովել հաղթանակ իրենց մարզիկի համար», – նշել է Ունանյանը։

Մրցաշարի լուրջ մարտահրավերները հաղթահարելուն զուգահեռ Կամո Ունանյանը ստիպված է եղել հաղթահարել նաև առողջական խնդիրները (3 ամիս առաջ նա ենթարկվել էր ողնաշարի վիրահատության)։ Եզրափակչի օրը անտանելի սուր ցավեր է ունեցել, և բժիշկների օգնությամբ հաղթահարելով կարողացել է պատվով ավարտել մենամարտը։

«Երբ արդեն դուրս էի եկել եզրափակիչ, մեջքիս ցավերը շատ ուժեղ էին։ քանի որ եզրափակիչը երեկոյան էր, բժիշկների օգնությամբ կարողացա դիմակայել և հաղթել»,-պատմել է աշխարհի հնգակի չեմպիոնը։