ԱՄՆ-ում ՌԴ դեսպանը խոսել է Ռուսաստանի և ԱՄՆ-ի «պրագմատիկ սակարկությունների» մասին

ԱՄՆ-ը Ռուսաստանի հետ «պրագմատիկ սակարկություններ» է վարում երկկողմ հարաբերություններում «գրգռիչների» վերացման հետ կապված հարցերի շուրջ։ Այս մասին ՏԱՍՍ-ին տված հարցազրույցում հայտնել է Վաշինգտոնում ՌԴ դեսպան Ալեքսանդր Դարչիևը։

Նրա խոսքով, ներկայիս շփումները տարբերվում են նախորդներից նրանով, որ Սպիտակ տան և Պետդեպարտամենտի պաշտոնյաները «չեն փախչում» ռուսական դիվանագիտական ​​առաքելության ներկայացուցիչներից և չեն փոխարինում խնդիրների էության քննարկումը «մենախոսություններով ու պախարակումներով», այլ գերադասում են «պրագմատիկ սակարկությունները» դատարկ խոսակցություններից։

Դեսպանն ասել է, որ Ռուսաստանի և Միացյալ Նահանգների ներկայացուցիչները բանակցություններ են սկսել ամերիկյան տարածքում ռուսական դիվանագիտական ​​սեփականության վեց փաստացի առգրավված օբյեկտների հասանելիության ապահովման շուրջ։