Ծոծրակներդ կտեսնեք՝ ՀՀ-ում քաղաքացիական պատերազմ չեք տեսնի․ ՔՊ–ական պատգամավոր

Հակաեկեղեցական արտահայտությունը ընդհանրապես տեղին չի: Սա ընդամենը դեմ է Եկեղեցու այն ներկայացուցիչներին, որոնք տարիներ շարունակ ուխտը դրժել են և այլևս չեն կարող Եկեղեցում բարձրաստիճան պաշտոն զբաղեցնել: Այստեղ հարցը հետևյալն է՝ արդյո՞ք էդ մարդիկ այնքան բարեվարքություն կունենան, որպեսզի առանց որևէ մեծ խժդժությունների թողնեն Վեհարանը և իրենք իրենց հավատքին անսալով՝ ավելի մաքուր և ավելի բարեվարք Կաթողիկոս ընտրեն:  Այս մասին լրագրողների հետ զրույցում ասել է ԱԺ ՔՊ–ական պատգամավոր Լիլիթ Մինասյանը։

Նրա խոսքով՝ ընդդիմությունն իրենց առաջ բերած օրակարգերը միշտ կապում է Ադրբեջանի հետ։

«Մենք ներքաղաքական, ներքին թեմա քննարկելու իրավասություն չունենք՝ ըստ իրենց, որովհետև ամեն ինչը նրանց ուղեծրում պտտվում է հակա-ադրբեջանական, հակա–թուրքական մտքերի ներքո:

Հարգելի գործընկերներ, եկեք քննարկենք իրողությունները, որոնք չեք հերքում, հերքեք գոնե այն իրողությունները, որոնց մասին խոսել ենք: Օրինակ, երբ խոսում էր վարչապետը որոշ եկեղեցիների մասին, ուզում եմ շեշտել, որ մեր եկեղեցիների մեծ մասը շատ բարեկարգ, շատ մաքուր և շատ լավ եկեղեցականներով լի հաստատություններ են: Խնդիրը հետևյալն է՝ արդյո՞ք կան եկեղեցիներ, որոնք ունեն բարեկարգման խնդիր, արդյո՞ք կան եկեղեցիներ, որոնք մաքրության խնդիր ունեն, արդյո՞ք կան եկեղեցներ, որոնց դիմաց վաճառք են անում։ Այդ խնդիրները առկա՞ են, թե ոչ: Կա կուսակության խախտում, հարց է հնչեցվել: Եկեք էդ խնդիրներից խոսենք, հետո նոր դարձրեք այդ հարցը աշխարհաքաղաքական քննարկման հարց»,– ասել է Մինասյանը։

ՔՊ–ական պատգամավորի պնդմամբ՝ իրենք տեսնում են, որ քաղաքացիների մեծամասնության սերն ու հարգանքը Գարեգին Բ–ն չի վայելում։

Անդրադառնալով քաղաքացիական պատերազմ հրահրելու մեղադրանքներին՝ նա նշել է․

«Ծոծրակներդ կտեսնեք ՀՀ–ում քաղաքացիական պատերազմ չեք տեսնի։ Մեր ժողովուրդը շատ խոհեմ է, ողջամիտ, մենք երբևիցե նման կոչ չենք կարող իրականացնել և այն քաղաքական ուժերը, որոնք նման թեզեր են կիրառում, երևի թե նրանց երազանքն է եղել այս տարիների ընթացքում վերջապես հասնել նրան, որ քաղաքացիական բախումներ լինեն»։