Թրամփը կայք է բացել ԱՄՆ-ի «ոսկե քարտ» ցանկացողների համար

ԱՄՆ նախագահ Դոնալդ Թրամփը հայտարարել է, այսպես կոչված, Trump Card-ի՝ ԱՄՆ-ում 5 միլիոն դոլարով բնակության թույլտվություն ստանալու համար դիմելու հատուկ կայքէջի բացման մասին։ Այս մասին հայտնում է Al Jazeera-ն։

Ըստ լրագրողների՝ TrumpCard.gov կայքը նախատեսված է պոտենցիալ դիմողների համար, ովքեր ցանկանում են ստանալ մշտական ​​բնակություն, իսկ հետագայում՝ քաղաքացիություն։ Պորտալում օգտատերերին խնդրում են թողնել իրենց անունը, բնակության շրջանը և էլ.փոստի հասցեն, ինչպես նաև նշել՝ նրանք դիմում են՝ որպես անհատ, թե ընկերության անունից: «Բացված գրանցումը միայն առաջին փուլն է», -հայտնում է Թրամփի թիմը։

Truth սոցիալական ցանցի իր էջում Թրամփը հայտնել է, որ «հազարավոր մարդիկ զանգահարում են և հարցնում՝ ինչպես մտնել աշխարհի ամենամեծ երկիր և ամենամեծ շուկա»: Նա նաև ընդգծել է, որ «սպասումների ցուցակն արդեն բաց է»։

«Ոսկե քարտի» գաղափարը Թրամփը հնչեցրել է դեռևս փետրվարին։ Նրա խոսքով՝ ԱՄՆ-ը կեցության թույլտվություն կտրամադրի հարուստ ու հաջողակ մարդկանց, ովքեր կկարողանան մեծ գումարներ ծախսել, հարկեր վճարել ու աշխատատեղեր ստեղծել։