Բողոքի ցույցերի ֆոնին՝ Վաշինգտոն նահանգի քաղաքներից մեկում պարետային ժամ է սահմանվել

Ամերիկյան Վաշինգտոն նահանգի Սփոքեն քաղաքի քաղաքապետ Լիզա Բրաունը X սոցիալական ցանցի իր օգտահաշվում հայտնել է, որ քաղաքում բողոքի ակցիաների ֆոնին պարետային ժամ է մտցվում։

Նշվում է, որ պարետային ժամը մտցվել է չորեքշաբթի երեկոյան՝ ժամը 21:30-ին։ Այն կգործի մինչև հինգշաբթի առավոտյան ժամը 5-ը քաղաքի որոշ կենտրոնական հատվածներում: Բացառություն է արվում իրավապահների, արտակարգ իրավիճակների արձագանքման անձնակազմի, տեղի բնակիչների, ինչպես նաև աշխատանքի մեկնողների և ժամանողների համար։

Մինչ այս Լոս Անջելեսի ոստիկանությունը ռետինե փամփուշտներ էր կիրառել հարյուրավոր ցուցարարների դեմ պարետային ժամի գոտուց դուրս։ Ակտիվիստները երթով անցնում էին քաղաքով։ Մոտ մեկ ժամ ոստիկանները չեն ներկայացել, սակայն ավելի ուշ մեքենաներով ուժայինները շրջափակել են ամբոխին։

Իրենց մեքենաներից իջնելուց հետո ոստիկանները ռետինե փամփուշտներ են կիրառել։ Ոստիկանության գործողություններից հետո հավաքվածները նահանջել են, բայց չեն ցրվել։