Թրամփը 57 միլիոն դոլար է վաստակել իր անունով հուշանվերներից և կրիպտոարժույթից

ԱՄՆ նախագահ Դոնալդ Թրամփը բազմամիլիոն դոլարների եկամուտ է ստանում շքեղ իրերից և բիզնես ձեռնարկություններից, ինչպես նաև իր անունով կիթառների և Աստվածաշնչի հրատարակությունների վաճառքից: Այս մասին հաղորդում է ՏԱՍՍ-ը՝ հղում անելով ամերիկացի առաջնորդի 234 էջանոց ֆինանսական հայտարարագրին, որը հրապարակվել է հունիսի 13-ին:

Փաստաթղթում նշվում է, որ անցյալ տարի Սպիտակ տան ղեկավարը ավելի քան 57 միլիոն դոլար է վաստակել World Liberty Financial կրիպտոնախագծի շնորհիվ: Գործակալության տվյալներով՝ քաղաքական գործչի որդիները՝ Դոնալդ Թրամփ կրտսերը և Էրիկ Թրամփը, զբաղեցնում են առաջատար դիրքեր համապատասխան կազմակերպությունում: Այս նախագիծը ամերիկացի առաջնորդի համար հայտարարագրում նշված ամենամեծ եկամտի աղբյուրներից մեկն է:

Բացի այդ, Թրամփը 3 միլիոն դոլար է ստացել «Փրկեք Ամերիկան» գրքի վաճառքից: Նա ևս 2,8 միլիոն դոլար է վաստակել ժամացույցների վաճառքից, 2,5 միլիոն դոլար՝ օծանելիքի և սպորտային կոշիկների վաճառքից, 1,3 միլիոն դոլար՝ Աստվածաշնչի հրատարակությունների վաճառքից և 1,05 միլիոն դոլար՝ կիթառների վաճառքից: Ավելին, այս բոլոր իրերը հուշանվերներ են, որոնց վրա հատուկ նշված է ԱՄՆ գործող նախագահի անունը: