Ես եկեղեցի չեմ այցելում, ես աթեիստ եմ. Նիկոլայ Ծատուրյան

hraparak.am-ը գրում է․

Տևական ժամանակ է` Հայաստանի վարչապետ Նիկոլ Փաշինյանը թիրախավորել է Հայ առաքելական եկեղեցուն, եկեղեցականներին անվանում է` «պոռնկաբարոներ», Գարեգին Բ-ին մեղադրում է կուսակրոնության ուխտը դրժելու մեջ, պնդում է, որ Կաթողիկոսը դուստր ունի, ուստի պետք է լքի Վեհարանը, անգամ հանձնաժողով է ձևավորել, որպեսզի նոր Կաթողիկոս ընտրի, սակայն ՀՀ սահմանադրությունը հստակ տարանջատում է եկեղեցին իշխանությունից: Վարչապետ Նիկոլ Փաշինյանը գրեթե ամեն օր, նույնիսկ օրվա մեջ մի քանի անգամ գրառումներ է անում Կաթողիկոսի և այլ հոգևորականների մասին: Այսօր` ժամեր առաջ Փաշինյանը ֆեյսբուքի իր էջում գրել է. «Կտրիճ Ներսիսյան, այսինքն՝ մնացել եք մի քանի պոռնկաբարո «հոգեւորականների» հույսի՞ն։ Ինչո՞ւ մինչեւ հիմա կարգալույծ չեն պոռնկության մեջ բացահայտված «Զարեհ քահանա» կոչվածը եւ Սամվել Խաչատրյան կոչվածը, որը ոչ միայն սեփական ընտանիքն է պղծել, այլեւ Ձեր։ Ու բոլորը գիտեն այդ մասին։ Դուք անձամբ գիտեք դրա մասին»։ Դրանից առաջ էլ գրել էր. «Կտրիճ Ներսիսյանի խոսնակը հրապարակում է արել, թե ես իբր թլպատված եմ։ Պատրաստ եմ ընդունել Կտրիճ Ներսիսյանին ու իր խոսնակին եւ ապացուցել հակառակը։ Իսկ ինքը թող ի վերջո պատասխանի հարցին, կուսակրոնության ուխտը խախտե՞լ է, թե ոչ։ Զավակ ունի՞, թե ոչ»։ Ժամեր առաջ էլ գրել էր. «Մայր Աթոռ Սուրբ Էջմիածինը մեր ազգային բարոյականության էպիկենտրոնն է։ Երբ այդ էպիկենտրոնը գտնվում է Աստծո առաջ իրենց ուխտը դրժած, այլասերված, նույնիսկ աշխարհիկ մարդկանց համար անընդունելի եւ արգահատելի բարոյական կերպարով ու ապրելակերպով մարդկանց ղեկավարման ներքո, նշանակում է կասկածի տակ է դրված մեր բարոյականությունը։ Ես Հայ առաքելական եկեղեցու հավատարիմ հետեւորդ եմ, ով խանդաղատանքով է վերաբերվում մեր յուրաքանչյուր եկեղեցու յուրաքանչյուր քարի, սրտի տրոփյունով է լսում մեր սուրբ պատարագի ելեւէջներն ու ուղերձները, 35 տարի շարունակ ամեն օր Աստծո առաջ ծնկի է գալիս եւ աղոթում, ժամանակ առ ժամանակ ծոմապահության եւ պահեցողության մեջ է լինում, եւ ասում եմ՝ չենք կարող թույլ տալ, որ մեր ազգային բարոյականության էպիկենտրոնի նեխումը շարունակվի։ Սա Զատիկ է, որտեղ ՀՀ յուրաքանչյուր հավատավոր քաղաքացի, յուրաքանչյուր բարեպաշտ հոգեւորական պետք է զատվի որոշ բարձրաստիճան հոգեւորականների պոռնկաբարո ու ուխտադավ վարքից եւ Մայր Աթոռում վերահաստատի բարոյական այն հրամայականը, որ սահմանված է Հայ Առաքելական Եկեղեցու Կանոնագրքով։ Այլընտրանք չկա։ 
Կտրիճ Ներսիսյանին հորդորում եմ րոպե առաջ հեռանալ Վեհարանից։ 
Հայաստանյայց Առաքելական Սուրբ Եկեղեցու բոլոր հավատավոր հետեւորդներին եւ նրա արժեքներին հավատարիմ բոլոր հոգեւորականներին հորդորում եմ հստակ ձեւակերպել Վեհարանն ազատելու՝ Կտրիճ Ներսիսյանին ուղղված իրենց պահանջը եւ դրա մասին բարձրաձայնել։ Վեհարանը վեհի՛»։
Փաշինյանի այս գարնանային սրացումների եւ եկեղեցու դեմ ձեռնարկված արշավի մասին որոշ մտավորականներ դիրքորոշումներ են հայտնում, որոշները լռում են, սակայն անգամ Նիկոլ Փաշինյանին աջակցող որոշ արվեստագետներ պնդում են, որ Նիկոլ Փաշինյանը չունի իրավունք միջամտելու եկեղեցու ներքին գործերին, ինչպես նաև` հրապարակավ նման բառապաշարով խոսելու: Ռեժիսոր, ՀՀ ժողովրդական արտիստ, Թատրոնի և Կինոյի պետական ինստիտուտի դասախոս Նիկոլայ Ծատուրյանին «Հրապարակը» մի քանի հարց ուղղեց թեմայի մասին:

- Պարոն Ծատուրյան, ի՞նչ կարծիք ունեք եկեղեցի-իշխանություն պատերազմի մասին:

- Անկեղծ ասած, ես չեմ հետևում նրանց: Ոչ մի բանի հետ գործ չունեմ:

- Որպես ՀՀ քաղաքացի Ձեզ չի՞ հետաքրքրում, թե ինչ է կատարվում երկրում:

- Ես ի՞նչ գործ ունեմ է: Ես եկեղեցի չեմ այցելում, ես աթեիստ եմ:

- Այնուամենայնիվ, ի՞նչ կարծիք ունեք Գարգեին Բ-ի մասին: Նիկոլ Փաշինյանը գրեթե ամեն օր հայհոյում է վերջինիս:

- Իյա: Լավ եթե ուզում եք իմանալ, ասեմ` ես միայն Վազգեն կաթողիկոսին եմ հարգում, հարգում եմ նաև Խրիմյան Հայրիկին, միայն այդ երկուսին եմ ընդունում, մնացածին` չէ:

- Բայց նրանք երկուսն էլ մահացել են:

- Այո, բայց ժամանակին ապրել են և ես նրանց հարգում ու գնահատում եմ:

- Օրինակ` ինչո՞վ էր Վազգեն Կաթողիկոսը ավելի լավը: Վստա՞հ եք, որ եթե Վազգեն կաթողիկոսը ողջ լիներ այս արշավը նրա նկատմամբ էլ չէր ծավալվի:

- Վազգեն կաթողիկոսը քաղաքականությամբ զբաղվելու փոխարեն իր գործն էր անում:

- Պատմաբանները պնդում են, որ Հայ առաքելական եկեղեցին դարերով պետության դեր է կատարել, երբ հայերը պետականություն չեն ունեցել, ստո՞ւմ են պատմաբանները:

- Այո, հիմա բոլորն էլ ստում են:

- Գարեգին Բ-ն, Ձեր կարծիքով, խառնվո՞ւմ է քաղաքականությանը:

- Այո, բա ի՞նչ է անում, ի՞նչ գործ ունի նա քաղաքականության հետ:

- Ինչպե՞ս է արտահայտվում դա: Չխոսի՞ Արցախի, հայ ռազմագերիների մասին:

- Այ ցավդ տանեմ, ես ասում եմ` աթեիստ մարդ եմ, դա արդեն ամեն ինչ ասում է, էլ բան չունեմ ասելու: