«Սա վտանգավոր իրավիճակ է, որը կարող է պայթել». Փաշինյանի դստերը մկրտած Տեր Մինասը կոչ է անում ապաշխարել

Կարծում եմ՝ փորձում են պառակտում առաջացնել, որ ի վերջո քահանաները հպարտանան, ասեն՝ ինչ լավ է, վարչապետը մեզ իր եղբայրն է համարում: Բայց եղբայրն ո՞վ է: Քրիստոսին երբ որ ասացին, որ քո եղբայրները սպասում են քեզ դրսում, նա պատասխանեց՝  իմ եղբայրները նրանք են, որոնք լսում են Աստծո խոսքը և կատարում են այն: Այս մասին NEWS.am-ին ասել է Հայ Առաքելական Եկեղեցու Գեղարքունիքի թեմի Սևանավանքի վանահայր Տեր Մինաս ավագ քահանա Մարտիրոսյանը, ով 2020 թվականի օգոստոսին Սևանավանքում մկրտել է ՀՀ վարչապետ Նիկոլ Փաշինյանի կրտսեր դստերը՝ Արփիին:

«Աստծո խոսքը կատարողը պետք է ունենա խոնարհություն, համեստություն, պարկեշտություն, ներողամտություն: Ես այս բաները չեմ տեսնում այն մարդու կողմից, ում մասին դուք նշում եք, ընդհակառակը՝ ես տեսնում եմ իրավիճակը սրելու փորձեր, անընդհատ ցեխ շպրտել, ինչ-որ անհիմն բաներ հրապարակել: Սա վտանգավոր իրավիճակ է և չափն անցնելու դեպքում կարող է պայթել՝ դրանով վնասելով պետականությանը: Եթե իրենց թվում է, թե անձերի դեմ է այս պայքարը, ապա՝ ոչ: Այս պայքարը եկեղեցու դեմ է: Այս պառակտումները մեզ երբե՛ք օգուտ չեն բերի, երբե՛ք»,– ասել է նա:

Տեր Մինասը նշել է՝ Եկեղեցին մշտապես հալածվել է բոլոր դարերում:

«Անշուշտ, պատմության ընթացքում եղել են անհավատ, եկեղեցուն, եկեղեցականներին հալածող իշխանավորներ: Ե՛վ Բագրատ Սրբազանը, ե՛վ  Միքայել Սրբազանը, լինելով եկեղեցու նվիրյալ սպասավորներ, հալածանքի զոհ են: Ես նրանց խոսքում որևէ վտանգ չեմ տեսնում: Կարծում եմ խորը ցավը, տրտմությունը, երկրի և ժողովրդի ապագայի հանդեպ մտահոգությունն է ստիպել մեր սրբազաններին նման կերպ արտահայտվել: Իրենց պետք էր ճիշտ հասկանալ, աջակցել առաջին հերթին լավ քրիստոնյա լինելով, չտրվելով սադրանքներին, չիջնելով այն մակարդակին, որով եկեղեցու հակառակորդները փորձում են մեզ հունից հանել»,– հավելել է նա:

Մանրամասները՝ սկզբնաղբյուր կայքում։