Նրանք պետք է պատժվեն, իսկ դուք գնացեք՝ ջրեք․ Ավինյանի կարգադրությունը

Երևանի քաղաքապետ Տիգրան Ավինյանն անդրադարձել է քաղաքապետարանի ենթակայության տակ չգտնվող այգիների, մասնավորապես՝ Կոնսերվատորիայի դիմացի այգու վիճակին։

«Կոնսերվատորիայի այգին, որը երկարաժամկետ վարձակալության է տրված, ունենք դատական գործընթաց։ Դատական պրոցեսների շատ-շատ երկար ձգձգումները բերում են նրան, որ այդ այգիները սկսում են չորանալ։

Պետք է խնդրեմ՝ անկախ նրանից՝ վարձակալած է, թե ոչ, գնացե՛ք, ջրե՛ք այգին, որովհետև հետո մենք ենք պատասխան տալու»,- ասել է նա։

Նա հանձնարարել է ջրել այգին՝ անկախ նրանից, որ այն իրենց տիրապետության տակ չէ և դատական գործընթաց է ընթանում։

«Անկախ նրանից՝ դատական գործընթաց է, թե ոչ, վնաս է քաղաքին հասցված, մի հատ էլ իրավական տեսանկյունից շարունակությունը պետք է նայենք։

Ամեն կերպ պայքարում են, որ այգին մնա իրենց մոտ, որ չորացնե՞ն այգին։ Դա՞ է նպատակը։ Եթե դա է նպատակը, մի հատ էլ համապատասխան հետևանք պետք է իրենց համար ունենա չհետևելը, որովհետև սա քաղաքացին ուղիղ հասցված վնաս է։ Վնասում են մեզ՝ երևանցիներիս, Երևան քաղաքին, և իրենք պետք է պատժվեն։ Իսկ դուք գնացեք՝ ջրեք»,- ասել է նա։

Քաղաքապետը նաև նշել է. «Ովքեր այս գործերը քննում են դատական ատյաններում, ուզում եմ ուշադրություն հրավիրել այս գործերի վրա։ Երբ այս պրոցեսները շատ երկար են տևում, դրանք բերում են շատ վատ հետևանքների, և խնդրում եմ՝ հնարավորինս այս տեսակ գործերի, մանավանդ հանրային կարևորություն, հանրային շահ ներկայացնող գործերի վրա, մի փոքր ուշադրությունը սևեռել և շատ երկար պրոցեսներ չիրականացնել ու ինչ-որ ուղղությամբ որոշում կայացնել, որովհետև միայն այս գործը տարուց ավելի քննվում է։ Տարուց ավելի քննվում է, այգին չորացավ»։