Հարավային Կովկասում զարգացումներն ունեն երկու հիմնական առանցք․ Իրանի ԱԳՆ խոսնակ

Հարավային Կովկասում իրադարձությունների հետ կապված որևէ փոփոխություն չի եղել։ Ընդհանուր առմամբ, Հարավային Կովկասում զարգացումներն ունեն երկու հիմնական առանցք․ առաջինը՝ խաղաղություն և Ադրբեջան-Հայաստան տարաձայնությունների խաղաղ կարգավորումն է, իսկ երկրորդը վերաբերում է տարանցիկ և տրանսպորտային ուղիներին. այս մասին ասել է Իրանի ԱԳՆ խոսնակ Էսմայիլ Բաղաեին:

«Մենք միշտ ընդգծել ենք խաղաղության համաձայնագրի ստորագրումն արագացնելու անհրաժեշտությունը և կարծում ենք, որ այս գործընթացի հետաձգումը օգտակար չէ և կարող է հանգեցնել տարածաշրջանում լարվածության վերստին առաջացմանը։

Հետևաբար, մենք կոչ ենք արել և շարունակում ենք կոչ անել ինչպես Ադրբեջանի Հանրապետությանը, այնպես էլ Հայաստանի Հանրապետությանը լրջորեն անդրադառնալ այս հարցին՝ խաղաղության համաձայնագիրը վերջնականապես կնքելու համար։

Ինչ վերաբերում է տարանցիկ և տրանսպորտային ուղիներին, մենք միշտ աջակցել ենք հաղորդակցության ուղիների ստեղծմանը և զարգացմանը, մենք կարծում ենք, որ այս հարցը կարևոր է երկրների տնտեսական զարգացմանը նպաստելու և տարածաշրջանի երկրների միջև տնտեսական ու առևտրային հարաբերությունների ընդլայնման առումով։

Հետևաբար, լիովին համաձայն ենք այդ ուղիների ընդլայնման հետ։ Մենք միշտ շեշտել ենք, որ այս երթուղիները, այսինքն՝ հաղորդակցության ուղիների ընդլայնումը, ոչ մի կերպ չպետք է հակասեն պետությունների ազգային ինքնիշխանությանը և նրանց տարածքային ամբողջականությանը, և ոչ մի կերպ չպետք է հանգեցնեն տարածաշրջանի աշխարհաքաղաքականության կամ միջազգայնորեն ճանաչված սահմանների փոփոխությունների։

Այս օրերին բարձրացված մեկ այլ կետ է արտատարածաշրջանային խաղացողներին իրադարձություններին ներգրավելու հարցը, որը մենք բացարձակապես չենք համարում, որ դա տարածաշրջանի անվտանգության և զարգացման օգտին է։ Մենք սա հայտարարել ենք բոլոր շահագրգիռ կողմերին և ուրախ ենք, որ սա այն հարցն է, որի շուրջ կա որոշակի համաձայնություն։

Հարավային Կովկասին վերաբերող գործընթացներին որոշ արտատարածաշրջանային կողմերի մասնակցության մասին տարածված լուրերը հերքվել են շահագրգիռ խաղացողների կողմից։ Հետևաբար, սա այն հարցն է, որը մենք ուշադիր հետևում ենք և սերտ կապեր ենք պահպանում երկու երկրների հետ»,– ասել  է նա։