ԱՄՆ վերաքննիչ դատարանը անօրինական է ճանաչել Թրամփի մաքսատուրքերի մեծ մասը

ԱՄՆ վերաքննիչ դատարանը 7-4 քվեարկությամբ անօրինական է ճանաչել նախագահ Դոնալդ Թրամփի մաքսատուրքերի մեծ մասը՝ թուլացնելով նրա տնտեսական քաղաքականության առանցքային գործիքը։ Որոշման ուժի մեջ մտնելը հետաձգվել է մինչև հոկտեմբերի 14-ը՝ Վերաքննիչ դատարան դիմելու հնարավորության համար։ Դատական վեճը վերաբերում է Թրամփի՝ Արտակարգ տնտեսական լիազորությունների միջազգային ակտով (IEEPA) մաքսատուրքերի սահմանման իրավաչափությանը, որը պատմականորեն կիրառվել է հիմնականում պատժամիջոցների, ոչ թե մաքսատուրքերի համար։

Թրամփի վարչակազմը պնդում է, որ օրենքը թույլ է տալիս արգելափակել կամ կարգավորել ներմուծումը՝ ազգային անվտանգության սպառնալիքների դեպքում։ Մաքսատուրքերը հայտարարվել էին առևտրային դեֆիցիտի և ֆենտանիլի անօրինական ներմուծման դեմ պայքարի անվան տակ։ Սակայն դատարանը եզրակացրել է, որ Կոնգրեսը չի տվել նախագահին անսահմանափակ լիազորություններ հարկեր և մաքսատուրքեր սահմանելու հարցում։ Դատական հայցերը ներկայացրել էին փոքր ամերիկյան ընկերություններն ու 12 դեմոկրատական ղեկավարությամբ նահանգներ՝ պնդելով, որ մաքսատուրքերի սահմանման իրավունքը միայն Կոնգրեսինն է։

Որոշումը համընկնում է Ֆեդերալ պահուստային համակարգի անկախության շուրջ ընթացող վեճի հետ և սպառնում է Թրամփի ամբողջ տնտեսական օրակարգը հասցնել Գերագույն դատարան։ Վերլուծաբանների խոսքով՝ Թրամփի վարչակազմը պատրաստվում է այլ իրավական ուղիներով պահպանել մաքսատուրքերը։ Գերագույն դատարանի առաջիկա որոշումները կարող են սահմանել նախագահի լիազորությունների նոր սահմանները՝ միջազգային առևտրի և տնտեսական քաղաքականության ոլորտում, փոխանցում է Reuters-ը։