Հայտնի դեղամիջոցը կարող է մեծացնել մահվան ռիսկը կանանց մոտ՝ սրտի կաթվածից հետո

Տասնամյակներով սրտի կաթվածից հետո առաջնային բուժման համար կիրառվող բետա-բլոկատորները կարող են ոչ միայն չօգնել, այլև բարձրացնել հիվանդանոցային ընդունումների և մահվան ռիսկը որոշ կանանց մոտ։ Եվրոպական սրտաբանների կոնգրեսում ներկայացված լայնածավալ հետազոտությունը ցույց է տվել, որ նորմալ սրտային ֆունկցիայով կանայք, ովքեր ստացել են այս դեղամիջոցները, գրեթե երեք անգամ ավելի հաճախ են մահացել կամ ունեցել կրկնակի սրտի կաթված՝ համեմատած դեղ չստացածների հետ։

Մասնագետները նշում են, որ տարբերությունը կապված է ինչպես կանանց սրտի չափերի, այնպես էլ նրանց ավելի բարձր զգայունության հետ՝ արյան ճնշման դեղերի նկատմամբ։ Տարիներ շարունակ սրտային հիվանդությունների ուսումնասիրություններն կենտրոնացած են եղել տղամարդկանց վրա, ինչի հետևանքով կանանց մոտ ախտանշանների ու բուժման առանձնահատկությունները երկար ժամանակ անտեսվել են։ Բետա-բլոկատորների կողմնակի ազդեցությունները ներառում են ցածր ճնշում, հոգնածություն և տրամադրության տատանումներ։

Հետազոտության հեղինակները շեշտում են, որ բուժման մոտեցումները պետք է դառնան սեռային առանձնահատկությունների նկատմամբ զգայուն։ Չնայած այս դեղերը շարունակում են արդյունավետ մնալ սրտի լուրջ վնասվածքով հիվանդների համար, նոր տվյալները վկայում են, որ անհրաժեշտ է վերանայել ավելի քան 40 տարի կիրառվող ստանդարտները։ Սա կարող է փոխել միջազգային բժշկական ուղեցույցները և խթանել անհատականացված մոտեցումները սրտային հիվանդությունների բուժման մեջ, փոխանցում է CNN-ը։