Թուրքիան հերքում է ծովում վտանգավոր բակտերիաների հայտնաբերման լուրերը՝ զբոսաշրջիկների ահազանգերի ֆոնին

Թուրքիայի առողջապահության նախարարությունը հայտարարել է, որ ծովի ջրի վերջին լաբորատոր փորձաքննությունները չեն հաստատել վտանգավոր Vibrio տեսակի բակտերիաների առկայություն։ Միջազգային լրատվամիջոցներում տարածված հաղորդագրությունների ֆոնին՝ թուրքական գերատեսչությունը ընդգծել է, որ երկրում նման վարակների դեպքեր չեն գրանցվել, իսկ մոնիթորինգը շարունակվում է։

Ավելի վաղ մի շարք ԶԼՄ-ներ հայտնել էին, որ Ալանիայում հանգստացող ռուս զբոսաշրջիկների ընտանիք էր հոսպիտալացվել՝ ենթադրաբար ջրից ստացված վարակի պատճառով։ Թուրք բժիշկները զգուշացրել էին Vibrio բակտերիաների վտանգի մասին, որոնցից մեկը՝ Vibrio cholerae-ն, կարող է առաջացնել խոլերա։

Ռուսաստանի զբոսաշրջության ոլորտի ներկայացուցիչներն ու Ռոսպոտրեբնադզորը հաստատել են, որ զանգվածային բողոքներ կամ վարակի դեպքեր չեն արձանագրվել։ Մասնագետները նշել են, որ Vibrio-ի տարածումը սեզոնային բնույթ ունի և հիմնականում կապված է չեփած ծովամթերքի օգտագործման հետ։