Ավինյանենք նոր կինո են նկարել՝ «հասցրու վճարել ավտոբուսում 60 վայրկյանում». Սամվել Հակոբյան

Պարոն Փամբուխչյան, ձեր տեղը բարդ տեղ է, Դուք այս իշխանության պաշտպանական վահանն եք, որովհետև հենց գալիս է ելույթների ժամանակը, հենց տեսնում եք, որ ընդդիմադիրների ձեռքերը շատ են, Ավինյանը գնում է, Դուք գալիս եք, այսինքն՝ Ձեր կապը ընդդիմության հետ ավելի ուղիղ է, ավելի սերտ է։ Այս մասին Երեւանի ավագանու նիստում հայտարարեց ավագանու «Մայր Հայաստան» խմբակցության անդամ Սամվել Հակոբյանը։

Խոսելով Երևանում տրանսպորտային համակարգի վիճակի մասին՝ Սամվել Հակոբյանն ասաց. «Մենք այսօր ունենք չքննարկվող, չզեկուցվող հարց տրանսպորտի վերաբերյալ, որը ամբողջ հանրությանը հետաքրքրում է։ Հիշում եք՝ այն ժամանակ ֆիլմ կար «Գողանալ մեքենա 60 վայրկյանում»։ Հիմա էլ ավինյանենք նոր կինո են նկարել, հասցրու վճարել ավտոբուսում 60 վայրկյանում։ Ավինյանին և ամբողջ քաղաքային իշխանությանը կոչ եմ անում պիկ ժամին գնացեք կանգառներ, փորձեք մտնել, տեղ անել ավտոբուսում ու 60 վայրկյանում էլ վճարել։ Այդ ձեր հսկիչներին էլ ձեր հետ տարեք այնտեղ, տեսեք ում ձայնը ավելի բարձր կլսվի ձեր ու ձեր հսկիչների, թե այն բնակչության, ով իր ուղիղ կարծիքը կասի տրանսպորտի ձեր բարեփոխումների մասին»։