Ո՞ւմ դեմ է կիրառվելու Փաշինյանի «պողպատե մանդատը»․ ՔՊ–ական Գալջյանի մեկնաբանությունը

Երևանի ավագանու «Քաղաքացիական պայմանագիր» խմբակցության ղեկավար Արմեն Գալջյանը չցանկացավ մեկնաբանել ՔՊ խմբակցության պատգամավոր Արթուր Հովհաննիսյանի արտահայտությունները պատգամավոր Թագուհի Թովմասյանի վերաբերյալ։

«Ցանկություն չունեմ մեկնաբանելու։ Պետք է իմ աչքով տեսնեմ, ես չեմ ուզում մեկնաբանել ինչ–որ բան, ինչի մասին ինֆորմացված չեմ»,– լրագրողների հետ զրույցում ասաց նա։

Անդրադառնալով տրանսպորտից օգտվելու կանոնները խախտելու համար տուգանքներին՝ Գալջյանը նշեց, որ ստեղծվել է հատուկ հանձնաժողով, որը քննում է քաղաքացիների բողոքները՝ կապված տուգանքների հետ․ «Ինչքան գիտեմ՝ 5 դեպքով բողոքները չեղարկվել են։ Այսինքն՝ մեխանիզմը գործում է, առնվազն որոշակի օբյեկտիվ քննություն տեղի է ունենում»։

Պատասխանելով հարցին, թե ո՞ւմ դեմ է կիրառվելու վարչապետ Նիկոլ Փաշինյանի «պողպատե մանդատը»՝ Գալջյանն ասաց․ «Կարծում եմ՝ կիրառվողների թիվը քիչ չէ։ Այդ մուրճի կիրառման համար ստեղծվել են համապատասխան իրավական կարգավորումներ, իրավական դաշտ։ Կարծում եմ՝ մուրճը միայն տեսքով մուրճ չէ։ Այն մեխանիզմ է, պետական համակարգ է, որ պետք է ձևավորվեր, որ կիրառվեր։ Կարծում եմ՝ մենք ձևավորել ենք և կիրառման բուն փուլում ենք գտնվում»։