«Խնջույքը ավարտված է». Եվրոպական ավտոարտադրողները կանգնած են մաքսատուրքերի և Չինաստանի գնային պատերազմի առաջ

Եվրոպայի խոշոր ավտոարտադրողները Մյունխենի IAA Mobility ցուցահանդեսում ներկայացրել են նոր մոդելներ՝ փորձելով հաղթահարել գլոբալ ճնշումները։ Volkswagen-ի և Porsche-ի ղեկավար Օլիվեր Բլյումեն հայտարարել է, որ «տասնամյակներ շարունակ տևած խնջույքը» ավարտվել է․ ոլորտը կանգնած է խորը վերակողմնորոշման անհրաժեշտության առաջ՝ Չինաստանում վաճառքների անկման, Եվրոպայում թույլ պահանջարկի և ԱՄՆ բարձր մաքսատուրքերի պայմաններում։

Չինական շուկայում 27.9% վաճառքի անկում գրանցած Porsche-ն վերակառուցում է իր տեղական ցանցը՝ հրաժարվելով երկարաժամկետ բարձր շահութաբերության ծրագրերից։ BMW-ն հույսը դնում է նոր iX3 մոդելի վրա, որը նախատեսվում է ներկայացնել 2026-ի ամռանը՝ փորձելով դիմակայել «անհավանական դաժան գնային պատերազմին»։ Mercedes-Benz-ը մինչև 2027-ը նախատեսում է թողարկել շուրջ 40 նոր մոդել և կրճատել միլիարդավոր եվրո ծախսեր՝ Չինաստանում դիրքերը վերականգնելու համար։

Վերլուծաբանները նշում են, որ եվրոպական ավտոարտադրողները պետք է արագացնեն նոր մոդելների մշակման գործընթացը՝ մրցունակ մնալու համար։ Չինական ընկերությունները՝ մատչելի մարտկոցներով և ագրեսիվ գնային ռազմավարությամբ, արդեն դարձել են շուկայի առաջատար։ Ըստ McKinsey-ի կանխատեսումների՝ մինչև 2032 թվականը եվրոպական ընկերությունները կթողարկեն 350 նոր էլեկտրամեքենա՝ պատրաստվելով 2035-ից ներքին այրման շարժիչով մեքենաների արգելքին, որին ընդդիմանում են Գերմանիայի խոշոր արտադրողները։