Տոկիոյում հորդառատ անձրևի պատճառով երկաթուղային և օդային հաղորդակցությունը դադարեցվել է

Տոկիոյում հինգշաբթի հորդառատ անձրևը հեղեղել է որոշ փողոցներ և դադարեցրել երկաթուղային և օդային հաղորդակցությունը, կանխատեսվում են նոր փոթորիկներ, հաղորդում է Associated Press-ը։

Ճապոնիայի օդերևութաբանական գործակալության տվյալներով՝ մայրաքաղաքում ընդամենը մեկ ժամվա ընթացքում տասներկու սանտիմետր անձրև է տեղացել։ Տոկիոյի Հանեդա օդանավակայանում օդային երթևեկության կառավարումը և այլ ցամաքային ծառայություններ դադարեցվել են կայծակի հարվածների պատճառով, որոնք խոչընդոտել են ինքնաթիռների թռիչքին։

Երկաթուղային հաղորդակցությունը ևս ժամանակավորապես դադարեցվել է, դրանց թվում՝ արագընթաց գնացքը և տարածաշրջանի այլ գծերը։ Տոկիոյում տեղատարափ անձրևը հեղեղել է փողոցները, և որոշ սոցիալական ցանցերի օգտատերեր հայտնել են, որ ուժեղ կարկուտ են տեսել։

Ըստ Tokyo Electric Power Company Holdings –ի՝ Տոկիոյի ավելի քան 7000 տուն որոշակի պահի մնացել է առանց էլեկտրաէներգիայի։ Հինգշաբթի ուշ երեկոյան դրանց մեծ մասը վերականգնվել է։ Իշխանությունները զգուշացրել են գիշերը սպասվելիք ամպրոպների մասին և բնակիչներին կոչ են արել մնալ տանը, խուսափել ավելորդ ուղևորություններից և հետևել եղանակի տեսության թարմացումներին։