«Մարիլա»-ի թթվասերն անվտանգ է. ՍԱՏՄ-ն թույլատրել է վերսկսել արտադրությունը

Վերացվել է «Մարիլա» ՍՊԸ-ին պատկանող կաթնամթերքի արտադրամասի (Սյունիքի մարզ, ք․Կապան) արտադրական գործունեության առանձին գործառույթի՝ «Թթվասեր» արտադրատեսակի արտադրության կասեցումը:

Այս մասին հաղորդագրություն է տարածել ՀՀ սննդամթերքի անվտանգության տեսչական մարմինը։  

Նշվում է, որ հիմքը լաբորատոր կրկնակի փորձաքննության արդյունքն է, որով փաստվել է այդ ապրանքատեսակի համապատասխանությունը Մաքսային միության տեխնիկական կանոնակարգերով սահմանված պահանջներին:

Սննդամթերքի անվտանգության տեսչական մարմինը օգոստոսի 26-ին հաղորդագրություն էր տարածել՝ հայտնելով, որ տեսչական մարմնի Երևանի կենտրոնի տեսուչները ստուգում են իրականացրել «Մարիլա» ՍՊԸ-ին պատկանող կաթնամթերքի արտադրամասում (Սյունիքի մարզ, ք․ Կապան), որի ընթացքում կատարել են ապրանքատեսակների նմուշառում և հանձնել լաբորատոր հետազոտության: 

Լաբորատոր փորձաքննության արդյունքները ցույց էին տվել, որ «Թթվասեր» (արտադրված ՝ 14․08․2025) արտադրատեսակի նմուշը ԱՑԽՄ (աղիքային ցուպիկի խմբի մանրէներ) ցուցանիշով չի համապատասխանել ԵԱՏՄ տեխնիկական կանոնակարգերով սահմանված պահանջներին։ Կաթնամթերքի արտադրամասի առանձին արտադրատեսակի գործունեությունը դադարեցվել էր՝ մինչև հայտնաբերված խախտումները վերացնելը։

Տրվել էր խմբաքանակների իրացումն արգելելու, շուկայից հետ կանչելու, ոչնչացնելու կամ օգտահանելու մասին կարգադրագրիր։ Հանձնարարվել էր արտադրատեսակը համապատասխանեցնել սահմանված նորմերին։