2023 թվականին Եվլախում որևէ փաստաթուղթ չի ստորագրվել. Շահրամանյան

Երկրորդ տարին է, ինչ ներկայանում ենք Եռաբլուր և հարգանքի տուրք մատուցում մեր զոհված հայրենակիցներին, ովքեր առաջինն են ընդունել Ադրբեջանի ագրեսիայի հարվածը և հնարավորություն տվել մեր բնակչությանը, որպեսզի կարողանանան ինչ–որ չափով խաղաղ դուրս գալ և ապահովել իրենց անվտանգությունը։ Եվ ագրեսիայի հետևանքով մենք հայրենազրկվել ենք, բռնի տեղահանվել։  Այս մասին Եռաբլուրում լրագրողների հետ զրույցում ասաց Արցախի նախկին նախագահ Սամվել Շահրամանյանը։

Նա նշեց, որ խեղաթյուրվում են 2023 թվականի սեպտեմբերի 19–ին տեղի ունեցած իրադարձությունները․ «Դասագրքերում տեղ գտած կեղծիքները մենք վիճարկում ենք իրավական ճանապարհով: Դրանք չեն արտացոլում իրականությունը։ Մեր նպատակն այն է, որ մեր սերունդները ստանան իրական տեղեկություն, և դատական նիստերի ընթացքում կներկայացնենք անհրաժեշտ տեղեկությունները, որոնք կհիմնավորեն մեր ասածները»,– ասաց Շահրամանյանը։

Արցախի նախկին նախագահը նաև հայտարարեց՝ 2023 թվականին Եվլախի հանդիպմանը ինքը չի մասնակցել, որևէ փաստաթուղթ չի ստորագրել։

«Երբևէ Եվլախում չեմ եղել, Եվլախում հանդիպմանը մասնակցած անձինք որևէ փաստաթուղթ չեն ստորագրել, և այդ հանդիպումն ունեցել է հումանիտար բնույթ»,– ասաց Սամվել Շահրամանյանը։