2-3 հոգի կռավատի տակ փաթաթված էին, մի հոգի ճաղավանդակի մոտ. Ազատի զինվորական կացարանի հրդեհի գործով վկա

Գեղարքունիքի մարզի ընդհանուր իրավասության դատարանում, դատավոր Վարդան Հարությունյանի նախագահությամբ, ընթանում է Ազատ գյուղի զինվորական կացարանում զոհված 15 զինծառայողների գործով դատական հերթական նիստը, հարցաքննվում են վկաները։ 

Ավագ հրշեջ փրկարար Հայկ Վարդանյանը իր ցուցմունքում նշեց, որ  դեպքի օրը հերթապահության չի եղել։

«Ինձ կանչել են փրկարար ծառայության հերթապահը։  Զանգել, կանչել են։ Հասել եմ դեպքի վայր, արդեն տանիքը լրիվ նստած էր, պատը փլված էր։ Հրդեհաշիջման, փրկարարական  աշխատանքներ էին իրականացվում հրշեջ փրկարար ծառայության կողմից։

Որոնողափրկարարական աշխատանքներ ենք իրականացրել, մաս-մաս մաքրելով՝ գնացել ենք առաջ՝ փորձելով հանել տուժածներին»,- ասաց նա։

Հարցին, թե ինչպես էր քանդվել պատը, վկան ասաց. «Խոսակցությունով գիտեմ, ինձ ասել են՝ Ուրալ է խփել, քանդել»։

Նա ասաց, որ իրենց հրաման էր տալիս Մխիթար Կարապետյանը։ 

«Այդ պահին մեզ հրահանգը եղել է, որ ներսում 15 հոգի տուժած կա, պետք է որոնել ու գտնել իրենց։ Ինձ մոտ տպավորել է՝ 2-3 հոգի կռավատի տակ փաթաթված էին, մի հոգի ճաղավանդակի մոտ, մեջքը հենած կռավատին, այսինքն՝ մնացել էր ճաղավանդակի ու մահճակալի արանքում»։ 

Հ. Վարդանյանը նշեց, որ հարցուփորձով ինչքան հիշում է ասում էին՝  հրդեհը վառարանի վրա բենզին է լցվել, դրանից է հրդեհ բռնկել։

Հարցին՝ ո՞վ է լցրել, նա ասաց. «Եղիշե... Ազգանունը չեմ հիշում։ Չգիտեմ՝ անվանական ասացին, թե ոչ այդ ժամանակ... 4 տարի է անցել։ Կոնկրետ ձեր հարցի պատասխանը չունեմ»։ 

Տուծող կողմի շահերի ներկայացուցիչ Նորայր Նորիկյանը հարցրեց, թե ո՞ր պահին է նկատել վառարանի մոտ այված զինծառայողին, նա ասաց. «Հենց սկզբից նկատել ենք։ Հովհաննիսյանի Լևոնի հետ հագել էինք ծխապաշտպան սարք, մուտք ենք գործել ներս»։ 

Հիշեցնենք, որ 2023-ին հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում  տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել էր 15 ժամկետային զինծառայող, 7 զինծառայող տեղափոխվել էր հոսպիտալ: