Հակոբ Կարապետյանին չեմ ճանաչում, հարցաքննվել եմ ՔԿ-ում, ունեմ վկայի կարգավիճակ․ Ավետիք Բաբայան

Երևանի նախկին քաղաքապետի մամուլի խոսնակ, լրագրող Հակոբ Կարապետյանը ԶԼՄ–ներին տված հարցազրույցներում ինձ մեղադրում է ծեծի կամ ծեծը պատվիրելու մեջ, ուզում եմ հրապարակավ ձեզ ասել, որ ես այդ ամենի հետ որևէ կապ չունեմ։ Հարցաքննվել եմ ՔԿ-ում, ունեմ վկայի դատավարական կարգավիճակ։ Ինձ թվում է, որ շատ շուտով իրավապահ համակարգը բոլոր հարցերի պատասխանը կտա։ Այս մասին լրագրողների հետ զրույցում ասել է Երևանի քաղաքապետարանի Հասարակական կարգի պահպանության ծառայության պետի պաշտոնակատար Ավետիք Բաբայանը։

Անդրադառնալով իր և Հակոբ Կարապետյանի նամակագրություններին՝ նա նշել է, որ նրան պատասխանել է «միայն այն կոնտեքստով, ինչով իրեն վիրավորել է», որից հետո, իր խոսքով, անմիջապես ստացել է հայհոյանքներ․ «Դրանից հետո խնդրել եմ հեռախոսահամարը՝ չհասկանալով, ոնց կարող  է անծանոթ մարդը դիմացինին ուղղակի չճանաչելով, հահոյանքներ հնչեցնի, նորից եմ ստացել հայհոյանքների տարափ, որից հետո դադարել է շփումը»,– պատմել է նա։

Քաղաքապետարանի աշխատակիցը նաև նշել է, որ Հակոբ Կարապետյանին չի տեսել, նրան չի ճանաչում․ «Մենք բռնությունը դատապարտում ենք։ Ժամանակին լինելով Երևանի քաղաքապետի մամուլի խոսնակ, նա չպետք է անցներ սահմանները և սեռական բնույթի հայհոյանքներ տար»,– ասել է Բաբայանը։

Հիշեցնենք, որ Երևանի քաղաքապետարանի աշխատակազմի հասարակական կարգի պահպանության ծառայության  պետի պաշտոնակատար Ավետիք Բաբայանը խիստ նկատողություն է ստացել վերադասից՝ Երևանի քաղաքապետ Տիգրան Ավինյանից։

Հիշեցնենք նաև, որ օրեր առաջ Երևանի քաղաքապետի նախկին խոսնակ, լրագրող Հակոբ Կարապետյանը ֆեյսբուքյան գրառմամբ հայտնել էր, որ հայհոյախառն ու սպառնալից հաղորդագրություններ է ստացել Ավետ Բաբայանից, որին հաջորդել է իր վրա հարձակումը։ Կարապետյանի խոսքով՝ աշխատավայրի մոտ անհայտ անձը ծեծի է ենթարկել իրեն։