Հայաստանը հարմարվում է նոր իրողություններին․ Ռուբեն Ռուբինյան

Այսօրվա փխրուն աշխարհում խաղաղության պահպանման համար պատասխանատու ենք բոլորս։ Պատերազմներն ու հակամարտությունները շարունակում են «դամոկլյան սրի» պես կախված մնալ ժողովուրդների գլխին՝ բերելով անհամար զոհեր ու տառապանքներ։ Այս տարիների ընթացքում աշխարհը ենթարկվել է բազում փոփոխությունների, Հայաստանի Հանրապետությունը նույնպես հարմարվում է նոր իրողություններին՝ հավատարիմ իր անկախությանը, ինքնիշխանությանը և հարևանների հետ խաղաղ ապրելու ձգտումներին։ Այս մասին «Հայաստանն ու Հարավային Կովկասը փոփոխվող աշխարհում․ ամրապնդելով ժողովրդավարությունն ու տարածաշրջանային անվտանգությունը» թեմայով ՆԱՏՕ-ի խորհրդարանական վեհաժողովի 108-րդ Ռոուզ-Ռոթ սեմինարի բացման խոսքում ասել է ԱԺ փոխխոսնակ Ռուբեն Ռուբինյանը։

Նա նշել է, որ Հայաստանը մշտապես կարևորել է ՆԱՏՕ–ի հետ գործընկերային հարաբերությունները, այդ թվում՝ խաղաղապահ առաքելություններին մասնակցությունը և ժողովրդավարական ինստիտուտների ամրապնդումը։

«ՆԱՏՕ–ի հետ համագործակցությունը հավասարակշռված և հավասարակշռող արտաքին քաղաքականության մասերից է և պատրաստ ենք շարունակել այդ համագործակցությունը, որն ուղղված է տարածաշրջանային և գլոբալ անվտանգության ամրապնդմանը»,– ասել է Ռուբինյանը։

ԱԺ փոխխոսնակը նաև հայտարարել է, որ տասնամյակներ շարունակ Հայաստանի անվտանգության ռազմավարությունը կախված է եղել միայն մեկ բևեռից, ինչը, նրա խոսքով, բազմաթիվ խնդիրներ է ստեղծել մեզ համար․ «Ներկայում աշխատում ենք դրա դիվերսիֆիկացման ուղղությամբ։ Քաղաքական, տնտեսական և անվտանգային հարաբերությունների դիվերսիֆիկացիան ենթադրում է հարաբերությունների կարգավորում հարևանների հետ և բարիդրացիական հարաբերություններ և համագործակցություն բոլոր կողմերի հետ»,– նշել է Ռուբինյանը։