Ալեն Սիմոնյանի հետ խնդիր չունեմ. Անդրանիկ Քոչարյանը՝ 44-օրյա պատերազմի քննիչ հանձնաժողովի զեկույցի մասին

ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը լրագրողների հետ զրույցում հայտարարել է, որ 44-օրյա պատերազմի վերաբերյալ քննիչ հանձնաժողովի զեկույցը պատրաստ է և արդեն փոխանցվել է ԱԺ նախագահ Ալեն Սիմոնյանին։

«Գլխավորն այն է՝ ունենք զեկույց, և շատ կարևոր է այն ներկայացնել լիագումար նիստին։ Զեկույցը պետք է ունենա հետևանք, որպեսզի դասեր քաղենք այն իրողություններից, որոնց մենք առնչվեցինք 44-օրյա պատերազմի ընթացքում», - ասաց Քոչարյանը։

Ըստ նրա՝ քննիչ հանձնաժողովը գործել է օրենքի շրջանակում․ «Քննիչ հանձնաժողովը իր զեկույցը ուղարկել է ԱԺ նախագահին՝ Կանոնակարգ օրենքի 25-րդ և 26-րդ հոդվածների պահանջով։Հիմա որոշները փորձում են ներկայացնել, թե մենք ժամկետ ենք խախտել, բայց դա թյուր պատկերացում է»։

Քոչարյանը ընդգծեց, որ ԱԺ նախագահ Ալեն Սիմոնյանի հետ որևէ խնդիր չունի․ 

 «Ես պարոն Սիմոնյանի հետ խնդիր չունեմ և չեմ կարող ունենալ։ Պարոն Սիմոնյանը ԱԺ նախագահն է, ես՝ պաշտպանության և անվտանգության հանձնաժողովի նախագահ։ Մեր հարաբերությունները, բացի ընկերականից, ունեն խիստ գործընկերային բնույթ, որը բխում է Կանոնակարգ օրենքից»։

Քոչարյանը հավելեց, որ զեկույցի եզրակացությունը ներառում է ավելի քան 20 էջ, իսկ ամբողջ փաստաթուղթը շատ ավելի ծավալուն է․

«Դրանք խիստ գաղտնիության պահանջով օժտված փաստաթղթեր են՝ ձայնագրություններով, որոնք կպահվեն համապատասխան գաղտնի բաժնում»,-հավելել է նա.։